هر آخشام تورکجه ورزش اوخو (313)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
سونگون والیبال تیمی رئال حدینده باغلانیر
ورزش آذربایجان خبر وئریر، مس‌سونگون والیبال تیمی‌نین طرفدارلاری چوخ اولسا دا باشگاهین اداره بؤلومونده اولان سورون‌لاریندان دولایی یاخشی سونوج‌لار قازانابیلمه‌میش‌لر. آنجاق سونگونون یئنی مودورو تبریز والیبالیندا بؤیوک ده‌ییشیک‌لیک‌لر یاراتماق ایسته‌ییر. نقی نصیری، باشگاهین یئنی مودورو، والیبال فدراسیونو ایله سوپرلیگ سهمیه‌سی آلماق اوچون دانیشیق آپارمیش‌دیر. بئله‌لیکله سونگون اؤلکه والیبالی‌نین بیرینجی سویه‌سینه چوخ گوجلو قاییتماق ایسته‌ییر. کئچن ایل‌لر تیمین رهبرلییی یئرلی و باشاری‌سیز مشقچی‌لرین اَلینده‌ایدی. آنجاق ایندی باشگاهین مودورلری سعید معروف، میللی والیبال تیمی‌نین اَسکی اولدوزونو مشقچی اولاراق سونگونه گتیرمیش. اونون سونگونه قوشولماسی میللی هابئله یابانچی اویونچولارین تیمه قوشولماسی اوچون فایدالی اولابیلر.
تراکتورون تهلوکه‌لی ایکینجی ائوی
ورزش آذربایجان خبر وئریر، تبریزین یادگار استادیومونون چمنی‌نی ده‌ییشمک سوره‌جی گلن فصل‌ده تراکتور اوچون حاشیه‌لر یارادابیلر. کئچن فصل استقلال و پرسپولیس تیم‌لری آزادی استادیومونون تعمیر سوره‌جینده اویون‌لارینی قلعه‌حسن‌خان استادیوموندا کئچیردیلر. او اوزدن قهرمانلیق کورسونا چاتابیلمه‌دیلر. دوغو آذربایجانین گنج‌لر و ورزش قورومونون مودورو، تراکتورون ایلک ایکی اویونونون بنیان‌دیزل‌ده کئچیریله‌جه‌یینی بیلدیرمیش‌دیر. آنجاق بو ورزشگاهین چمن، سکی‌لر و هابئله توتومو میزبانلیق اوچون اویغون دئییل. چمنین دورومو کئچن فصله گؤره داها پیس دورومدادیر. تراکتور آسیا قهرمان‌لار لیگاسی‌نین سهمیه‌سی‌نی قازانمیش‌دیر. او اوزدن بو سورون‌دان دولایی میزبانلیق امتیازینی اَلدن وئره‌بیلر. یادگارین تعمیر سوره‌جینی داها تئز باشاچاتدیرماق اوچون باشقا یول‌لاری دوشونمک گَرَکلی‌دیر. یوخسا تراکتور دا استقلال، پرسپولیس‌ین آجی تجروبه‌سینی یاشایابیلر.
آقاسی لیگین باهالی اویونچوسو
ورزش آذربایجان خبر وئریر، تراکتورون قهرمانلیغیندان سونرا ایران‌دا یاخشی دفاع اویونچوسونون یوخلوغوندان دولایی عارف آقاسی‌نین ایسته‌ین‌لری چوخالمیش‌دیر. آقاسی سون ایل‌لرده گووه‌نمه‌لی بیر اویونچو دا اولمامیش‌دیر. او استقلال‌دا اولدوغو زامان یاخشی سونوج‌لار قازانمامیش‌دیر. آنجاق کئچن فصل تراکتوردا پاریلدامیش‌دیر. او اوزدن بو اویونچو میللی تیمه ده چاغیریلمیش‌دیر. ایندی ایسه آقاسی سوپرلیگانین دؤرد تانینمیش باشگاهی ایله سؤزلشمه یازماق اوچون یوخاری رقم‌لر ایسته‌میش. بو اویونچو اوچون تراکتور، استقلال، پرسپولیس و یاخود سپاهان باشگاهی‌نین آراسیندا هئچ بیر فرق یوخدور. عارف اوچون تکجه پول اؤنملی‌دیر. او بو گونه هئچ بیر تیمله رسمی سؤزلشمه یازمامیش. آنجاق دئییلن‌لره گؤره او استقلال‌دان بیر فصل اوچون ایکی میلیون دلار ایسته‌میش. دونیانین تانینمیش باشگاه‌لاری داها یاخشی اویونچولار اوچون بو رقم‌لری وئریرلر. اؤرنک اوچون بارسلونا دا لنگله و بالده کیمی اویونچولارین رقمی بو قده‌ر‌دیر.
لوان پولی پورحمیدی‌نین یئرینده
ورزش آذربایجان خبر وئریر، تراکتور فوتبال تیمی اَللی بئش ایل‌لیک بیر حسرته سون قویاراق بیرینجی دفعه ایران سوپرلیگاسی‌نین قهرمانلیق عونوانینی قازانمیش‌دیر. اونلار کئچن فصلین آلیش وئریش گون‌لرینده یاخشی سونوج‌لار الده ائتمیش‌‌دیرلر. آنجاق بو گون‌لر رسمی اولاراق هئچ بیر ایش گؤرمه‌میش‌لر. حسین پورحمیدی تراکتوردان آیریلمیش‌دیر. او اوزدن باشگاهین مودورلری تیم اوچون ایکینجی بیر قاپیچی آختارماق‌دادیرلار. علیرضا بیرانوندین پرونده‌سی‌نین سونوجو دا بللی دئییل. اونون محروم اولماق احتمالی دا واردیر. او اوزدن باشگاه یابانچی بیر قاپیچی آلماق ایسته‌ییر. لوان پولی کئچن فصل نساجی‌نین داروازاسین قورویوردو. بو قاپیچی تراکتورون سئچه‌نک‌لریندن بیری ساییلیر. نساجی آزادگان لیگاسینا گئتدیینه رغمن لوان پولی سوپرلیگانین یاخشی قاپیچی‌لاریندان ساییلیر. باشگاه‌لا بو قاپیچی‌نین آراسیندا کئچیریلن ایلک دانیشیق‌لار یاخشی اولموش‌دور. اؤزل بیر سورون اولماسا گلن فصل تراکتورون کؤینه‌یینی گئیینه‌جک.
کد خبر 5710
