هر آخشام تورکجه ورزش اوخو (314)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
فرهاد قائمی اورمییه یولوندا
شهرداری اورمییه والیبال تیمی آلیش وئریش گون‌لرینده یاخشی سونوج‌لار قازانمیش‌دیر. اونلار فنی کادرلارینی گوجلندیرمک اوچون میللی تیمین اَسکی اولدوزلاریندان بیری، فرهاد قائمی‌نی تیمه گتیرمک ایسته‌ییرلر. اَلده ائتدییمیز بیلگی‌لره گؤره عبدالرضا علیزاده ایله فرهاد قائمی بو حاقدا دانیشمیش‌لار. باشگاهین مودورلری ده قائمی‌له آنلاشمیش‌لار. او اوزدن یاخین زامان‌دا رسمی سؤزلشمه یازیلاجاق‌دیر. قائمی‌له علیزاده ایل‌لر بویو میللی تیمده خولیو ولاسکونون رهبرلییی ایله چالیشمیش‌لار. ایندی ایسه اونلار باش‌مشقچی و فنی کادر عونوانی آلتیندا اورمییه‌نین شهرداری تیمینده خوش گون‌لرینی یئنی‌دن یاراتماق ایسته‌ییرلر. قائمی فنی اولاراق توپو آلماق و سرویس وورماق پست‌لاریندا چالیشمیش‌دیر. اونون تیمه قوشولماغی شهرداری اویونچولارینا یاخشی ائتکی‌لر بوراخابیلر.
ترابی‌یه میللی تیمده یئر یوخدور
اؤلکه‌نین میللی فوتبال تیمی بو گون(سه‌شنبه) ۲۰۲۶ دونیا کاپی‌نین یاریشمالاریندا قطرین میللی تیمی‌له گؤروشمک اوچون دوحه‌یه ساری یولا دوشموش. مهدی ترابی میللی تیمین اوردوسونا چاغیریلمیش‌دیر. آنجاق بو اویونچو بیر سیرا اؤزل نه‌دن‌لردن دولایی مشق‌لره قاتیلماق ایسته‌مه‌میش. ترابی بو ایشین نه‌دن‌لرینی بئله آچیقلامیش:« اویونچولاری میللی تیمه چاغیرماق اوچون نظرده آلینان اؤلچولر ورزش‌دن اوزاق‌دیر. فوتبالچی‌لار کیشی‌سل نه‌دن‌لردن دولایی چاغیریلیرلار. او اوزدن ده هئچ زامان اؤلکه‌نین میللی تیمی بو یاریشمالاردا یاخشی سونوج قازانمامیش‌دیر.» امیر قلعه‌نویی، میللی تیمین مشقچی‌سی ترابی‌نین جاوابیندا بئله دئمیش:« ترابی و احمد نوراللهی کیمی ادب‌سیز اویونچولاری آرتیق هئچ زامان میللی تیمه چاغیرمایاجاغام. اویونچولارین آراسینی قاریشدیرماق ایسته‌میرم.»
آقاسی؛ پرسپولیسه قوشولماغیم یالان‌دیر
عارف آقاسی تراکتورون دفاع اویونچوسو ایندی میللی تیمین اوردوسون‌دا‌دیر. سون زامان‌لار اونون پرسپولیسه قوشولماغی حاقدا شایعه‌لر یایینلانمیش‌دیر. آنجاق آقاسی بو شایعه‌لری بئله جاوابلامیش:« من تراکتوردا ایکی ایل یاخشی اویون اوینامیشام. سون زامان‌لار باشقا باشگاه‌لاردان اؤنری‌لریم ده اولموش‌دور.پرسپولیس باشگاهی ایله ده دانیشیغیم اولموش‌دور. آنجاق منیم پرسپولیس‌له هئچ بیر رسمی سؤزلشمه یازمامیشام. بو تیمه قوشولماغیم‌لا باغلی اولان خبرلر یالان‌دیر. ایندی بوتون دیققتیمی قطرین قارشیسیندا دورماغا وئرمیشم.» آقاسی‌نین بو تیمه قوشولماق خبری علیرضا بیرانوندین دانیشیق‌لاریندان سونرا یایینلانمیش‌دیر. بیرانوند جانلی بیر برنامه‌ده آقاسی‌نین پرسپولیسه قوشولماق خبرینی وئرمیش‌ایدی.
فولادین قاپیچی‌سی تراکتوردا
ادیب زارعی تراکتورون ۲۲ یاشلی اَسکی قاپیچی‌سی، سوپرلیگانین ۲۴-جو دؤرونون باشلانغیجیندا بورج اولاراق فولاد خوزستان تیمینه قوشولموش‌دور. او حذفی کاپ هابئله سوپرلیگ‌ده بیر نئچه دفعه اوزبکیستانلی قاپیچی، آکتیر یوسوپوفون یئرینه داروازادا دایانمیش‌دیر. زارعی حذفی کاپ‌دا فولاد هرمزگانین قارشیسیندا بئش پنالتی توتاراق آدینی دیل‌لره سالمیش‌دیر. چوخ‌لاری اونون گله‌جه‌یینین پارلاق اولاجاغینی ظن ائتمیش‌لر. بو قاپیچی‌نین سؤزلشمه تاریخی فولاد خوزستان‌لا بیتمیش‌دیر. او اوزدن تراکتورا قاییتمالی‌دیر. حسین پورحمیدی‌نین تراکتوردان آیریلماغی کسین‌لشمیش‌دیر. ایندی علیرضا بیرانوند ایله ادیب زارعی تراکتورون قاپیچی‌لاری ساییلیرلار. آنجاق زارعی‌نین تراکتوردان آیریلماق احتمالی دا یوخاری‌دیر.
کد خبر 5717
