تراکتور آسیا یاریشمالاریندا یالنیزدیر

تراکتور آسیا داهی‌لر لیگاسینا گئتمه‌یی باجارمیش‌دیر. او اوزدن بؤیوک بیر سوروملولوق باشگاه هابئله آذربایجان فوتبالینین بوینونا یوکله‌نمیش‌دیر. باشقا باشگاه‌لارا رغمن تراکتورا دؤولت طرفیندن هئچ بیر دستک اولان یوخدور. تیمین بوتون هزینه‌لرینی محمدرضا زنوزی، باشگاهین یییه‌سی، اؤده‌ییر. تهران، اصفهان وس. باشگاه‌لارین تعمیر هزینه‌سی ( آسیا یاریشمالارینا گؤره) دؤولتین( ورزش باخان‌لیغی و شهرداری) یاردیمی ایله اؤده‌نیلیر. تبریزده ورزشگاهین چمن ده‌ییشمک هزینه‌سیندن توتموش اویونچو آلماغا قدر هامیسی‌ زنوزی‌نین بوینوندادیر. تراکتور بئله بیر دوروم‌دا تاریخی دؤورلرینین بیرینه یاخین‌لاشماق‌دادیر. آسیا داهی‌‌لر لیگاسینا قاتیلماق آذربایجان فوتبالینی هامییا گؤسترمک اوچون یاخشی فورصت‌ ساییلیر. آنجاق چمن ده‌ییشمک ایشی‌نین چتین‌لیک‌لرینه گؤره  باشگاه بوتون دیققینی آلیش وئریش گون‌لرینده اویونچو آلماغا وئره‌بیلمیر.

تراکتورون حریف‌لری مارکت‌ده نه ائتمیش‌لر

سوپرلیگانین آلیش وئریش گون‌لری اوچونجو هفته‌سینه چاتمیش‌دیر. سپاهان، استقلال و پرسپولیس باشگاه‌لاری تیم‌لرینی گوجلندیرمک اوچون اؤنملی ایش‌لر گؤرموش‌لر. سپاهان باشگاهی امید نورافکن، محمدرضا اخباری، محمد عسگری، عباس حبیبی و محمدمهدی لطفی ایله سؤزلشمه یازمیش‌دیر. پیام نیازمندله رضا شکاری اونلاردان آیریلمیش‌‌لار. پرسپولیس ده مارکتین چالیشقان تیم‌لریندن‌دیر.‌ اونلار، پیام نیازمند، تیوی بیفوما، رضا شکاری ، امین کاظمیان، مجتبی فخریان، محمد عمری، و محمدحسین صادقی ایله سؤزلشمه یازمیش‌‌لار. استقلال دا تکجه سامان فلاحی، یئنی اویونچوسو اولاراق تانیتدیرمیش. رافائل سیلوا، زبیر نیک‌نفس، مسعود جوما دا استقلال‌ تیمیندن آیریلمیش‌‌لار. اونلارین باش‌مشقچی‌ رسمی اولاراق تانیتدیریلمامیش.


یالنیز: تنها
یاریشما: رقابت، مسابقه
داهی‌لر لیگاسی‌: لیگ نخبگان
سوروملولوق: مسئولیت
اؤده‌مک: پرداخت کردن
یاردیم: کمک
دستک: حمایت، کمک
اؤنملی: مهم
اویونچو: بازیکن
سؤزلشمه: قرارداد
باش‌مشقچی‌: سرمربی
چالیشقان: پرتلاش