هر آخشام تورکجه ورزش اوخو (321)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
دراقانین گؤزو بو اویونچونو توتموش
تراکتورلا دراقان اسکوچیچ نئچه پست‌دا چالیشان بیر مودافیعی آلماق اوچون آنلاشمیش‌لار. تخمین‌لره گؤره کرسیمیر کریزمنیک باشگاهین بیرینجی آلیشی اولاجاق‌‌دیر. عارف آقاسی‌نین تیمدن آیریلماغی کسین‌لشدیکدن سونرا تراکتور باشگاهی اونون یئرینده اوینایان بیر اویونچو آختارماق‌دادیر. ۲۴ یاشلی کریزمنیک، اَسکی‌دن کرواسی میللی تیمینده اسکوچیچ‌ین نظری آلتیندا چالیشمیش‌‌دیر. بو اویونچو تراکتورون باش‌مشقچی‌سی‌نین دیققتینی چکمیش‌دیر. کریزمنیک‌ین بویو ۱۸۸ سانتی‌متردیر. او کرواسی‌نین اوجا بوی‌لو اویونچولاریندان ساییلیر. او اوزدن تراکتورون دفاع خطینده چوخ یارارلی اولابیلر. کئچن فصل ۳۲ یاریشمادا مئیدانا گئتمیش‌دیر. ایکی قول و بیر قول پاسی دا اؤز آدینا یازمیش‌دیر.
یوبانماق اوچون زامان یوخدور!
مس‌سونگون والیبال تیمی سوپرلیگایا گئتمک‌له تبریزین والیبال سئورلرینی سئویندیرمیش‌دیر. آنجاق هوادارلارین نیگران‌چیلیغینا سبب اولان بیر نئچه سورون دا واردیر. سونگونون لیگه قوشولماق خبری‌نین اعلانی یوبانمیش‌دیر. هابئله تیمین فنی کادرینی سئچیلمه‌سی ده زامان آلمیش‌دیر. اونلار آلیش وئریش گون‌لرینده ده جیددی ایش‌لر گؤره‌بیلمه‌میش‌لر. آلیش وئریش گون‌لری سونونا یاخینلاشارکن سونگونون مودورلری بازارا نه شکیلده گیره‌جک‌لرینی بللی ائتمه‌میش‌لر. سونگون داها آرتیق یوبانماق‌لا یاخشی اویونچولاری اَلدن وئره‌بیلر. سونگونون فوتسال تیمی‌نین دورومو بللی اولدوق‌دان سونرا ایندی والیبال تیمی‌نین نؤوبه‌سی چاتمیش‌دیر. اونلار حریف‌لریندن گئری‌ده قالماماق اوچون سورعت‌له بازارا گیرملی‌دیرلر.
اسکوچیچ باشگاها لیست وئرمه‌میش
دونن آخشام، محمدرضا زنوزی جانلی بیر یایین‌دا ایران فوتبالی‌نین دورومونا جیددی انتقاد‌لار ائتمیش‌دیر. زنوزی تراکتورون یابانچی اویونچولارینین سؤزلشمه رقم‌لری حاقدا بئله دئمیش:« آلدیغیمیز بوتون یابانچی اویونچولارین سؤزلشمه رقم‌لری اوست اوسته ۹۰۰مین دلار اولموش. دروژدک بیر یاریم فصل اوچون ۱۵۰ مین دلار آلمیش‌دیر. سیز بو گون ۳۰۰ مین دلارلیق اویونچو دا گتیرسه‌نیز ۲۴ میلیارد تومن اولار. ایقور پوستونسکی ایله ایرانلی اویونچولاری قارشیلاشدیردیغیمیزدا هانسی‌نین داها گوجلو اولدوغو آیدین‌دیر. ایرانلی اویونچولارین ایسته‌دیک‌لری رقم‌لر بو پول‌لارین ایکی قاتین‌دان دا یوخاری‌دیر. زنوزی سؤزلرینین داوامیندا اسکوچیچ‌ین آلیش وئریش لیسته‌سی حاقدا بئله دئمیش:« او هله لیست وئرمه‌میش. بیز اویونچولاریمیزی ائشیکدن آلاجاغیق.»
آقاسی استقلال‌لا دا آنلاشمادی!
بو هفته عارف آقاسی ایله استقلال تیمی بیر نئچه دانیشیق‌دان سونرا آنلاشمیش‌دیرلار. آنجاق ایندی یئنی بیر اولای باش وئرمیش‌دیر؛ بئله‌لیک‌له او باشقا تیمه گئده‌بیلر. بو اویونچو اؤزونو ایلکین آنلاشمالاردان کنارا چکمیش‌دیر. یئنه ده تراکتور، پرسپولیس و استقلال تیم‌لرینین آراسیندا قالمیش‌دیر. تراکتور باشگاهی‌نین یییه‌سی، محمدرضا زنوزی، دونن جانلی بیر یایین‌دا بو مسئله حاقدا آچیقلاما وئرمیش‌دیر. زنوزی‌نین دئدیینه گؤره آقاسی تراکتورون ۴۰ میلیاردلیق اؤنری‌سینی رد ائتمیش‌دیر. بو مسئله‌دن سونرا دا تراکتور باشگاهی طرفیندن آقاسی‌یه هئچ بیر اؤنری وئریلمه‌میش. آنجاق استقلال‌لا پرسپولیس تیم‌لری آقاسی‌نین آلماق اوچون بیربیرلری‌له یاریشماق‌دادیرلار. استقلالین پیس دورومدا اولدوغونا گؤره پرسپولیس باشگاهی فورصتی اَله آلیب آقاسی‌نی آلماق ایسته‌ییر.
کد خبر 5768
