هر آخشام تورکجه ورزش اوخو (324)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
زنوزی تهدید‌لری فورصته چئویردی
محمدرضا زنوزی سس‌سیزجه جیددی دانیشیق‌لار آپارماق‌دادیر. او علیرضا بیرانوندین محروم اولماسی حاقدا اؤنملی بیر قرار وئرمیش‌دیر؛ تراکتور سوپرلیگ هابئله آسیا داهی‌لر لیگاسی‌نین یاریشمالارینی باشقا بیر قاپیچی ایله باشلایاجاق‌دیر. یاخین زامان‌دا بو یئتنکلی گلر تانیتدیریلاجاق. او تیمه قوشولاراق تراکتورون داروازاسی‌نین سورونونو آرادان قالدیراجاق. بیرانوندله پرسپولیسین پرونده‌سی‌نین سونوجو هله ده بللی دئییل‌دیر. آنجاق زنوزی بو حاقدا ریسکلی داورانماق ایسته‌مه‌ییر. پرسپولیس باشگاهی بیرانوندی باغیشلاماق اوچون یئرسیز ایستک‌لر آرایا قویموش‌دور. آنجاق تراکتور بو ایستک‌لره قارشی داها یاخشی توتومو اولموش‌دور. تهرانلی تیم بیرینجی قاپیچی‌سی‌نین آیریلیغینی دوشونرکن تراکتور ایکینجی قاپیچی‌سی‌نی آلاراق داها گوجلو اولماق ایسته‌ییر.
تراکتور سوپرجامین فاتحی
استقلال و تراکتور تیم‌لری یاخین زامان‌دا سوپرجام یاریشماسیندا قارشیلاشاجاق‌لار. آنجاق بو ایکی تیم تام فرقلی بیر دوروم‌دا بو اویونا قاتیلاجاق‌لار. تراکتور کئچن فصلین اؤنملی اویونچولارینی تیمده ساخلامیش‌دیر. بوندان علاوه اونلار بیر نئچه تانینمیش اویونچو دا آلمیش‌لار. اونلار تیمین تمل قورولوشونو قورویاراق داها گوجلنمک اوچون اؤنملی آددیم‌لار آتمیش‌لار. آنجاق استقلال تیمی آلیش وئریش گون‌لرینده باشاریلی اولمامیش‌دیر. اونلار تورکییه‌‌ده قاپیچی‌لاری اولمادان مشق ائتمک‌ده‌دیرلر. بو تیم دفاع خطینده اولان سورون‌لارینی دا آرادان قالدیرا بیلمه‌میش‌دیر. بعضی پست‌لاردا دا اویونچو‌لاری آزدیر. مرداد آیی‌نین ۲۰-جی گونو سوپرجام یاریشماسی کئچیریله‌جک. او اوزدن تراکتورون قارشیسیندا دایانماق ساپینونون شاگردلری اوچون چتین اولابیلر.
تراکتور پرسپولیسه اویونچو وئرمه‌یه‌جک
سون زامان علیرضا بیرانوندین پرونده‌سی‌نین حاقدا چوخلو شایعه‌لر یایینلانمیش‌دیر. بیر سیرا قایناق‌لارین خبرلرینه گؤره پرسپولیس باشگاهی بیرانوندی باغیشلاماغین قارشیسیندا تراکتورون بیر نئچه اویونچوسونو ایسته‌میش. سعید مظفری‌زاده، تراکتور باشگاهی‌نین مودورو، باشگاهین توتومونو بئله‌جه بللی ائتمیش:« فوتبال فدراسیونون‌دا ایکی باشگاهین آراسیندا دانیشیق‌لار اولموش‌دور. بیرانوندین پرونده‌سی حقوقی بیر مسئله‌دیر. بیز ده او یولدان بو سورونو چؤزمک ایسته‌ییریک. فنی کادرین دا توتومو بللی‌دیر. بیز اویونچولاریمیزی باشقا تیم‌لره وئرمه‌یه‌جه‌ییک. بیز اویونچولاریمیزین حاققینی ساوونماق اوچون بوتون گوجوموزله چالیشاجاغیق.»
استقلالین اولدوزو تراکتوردا
مهرداد محمدی تورکییه‌یه گئتدیینه رغمن استقلال تیمی‌نین اوردوسونا قاتیلمامیش‌دیر. دئییلن‌لره گؤره او تراکتور تیمینه قوشولاجاق‌دیر. استقلال باشگاهی بو اویونچونون تورکییه‌یه گئتمه‌سیندن خبرسیز اولدوغونو بللی ائتمیش‌دیر. تراکتورلا محمدی‌نین دانیشیق‌لاری بیر نئچه هفته اؤنجه‌دن باشلامیش‌دیر. بو اویونچو میللی تیمده چالیشدیغی زامان دراقان اسکوچیچ‌‌ین سئودییی اویونچولاردان‌ایدی. تراکتورون باش‌مشقچی‌سی بو مهاجمی یاخشیجا تانییر. بو مسئله اونون تیمه قوشولماق سوره‌جینی سورعت‌لندیره‌بیلر. محمدی ایله باشگاهین دانیشیق‌لاری یاخشی سونا چاتارسا بو اویونچو وینگر پُستون‌دا تیمین اؤنملی آلیش‌لاریندان بیری اولاجاق‌دیر.
کد خبر 5890
