هر آخشام تورکجه ورزش اوخو (329)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
ساپینو، سپاهان؛ آلوزی تحریک ائدیرلر
ریکاردو آلوز بیر آی اؤنجه سؤزلشمه‌سینی بیر طرفلی اولاراق پوزموش‌دور. باشگاهین تیمه قاییتماق اوچون آلوزه وئردییی فورصت ده سونا چاتمیش‌دیر. محمدرضا زنوزی‌نین دئدیک‌لرینه گؤره تراکتور بو حاقدا فیفایا نامه یازمیش‌دیر. زنوزی بو حاقدا سپاهان و استقلال تیم‌لرینین سوچلو اولدوغونا اینانیر. او بوگونکو دانیشیق‌لاریندا بئله دئمیش:« بیر تهرانلی باشگاه‌لا بیر شهرستانلی تیم آلوزی سؤزلشمه‌سینی پوزماق اوچون تحریک ائتمیش‌لر». زنوزی سؤزلرینین داوامیندا بو ایکی تیمین استقلال و سپاهان اولدوغونو وورغولامیش‌دیر.
سوپرجامین یوبانماسی ایمکان‌سیزدیر
تراکتور سوپرلیگانین قهرمانی و استقلال حذفی کاپین قهرمانی اولاراق اؤنجه‌دن بللی اولونموش تاریخ‌ده سوپرجام یاریشماسیندا قارشیلاشاجاق‌لار. استقلال باشگاهی لیگ قوروموندان بو یاریشمانین یوباندیریلماسینی ایسته‌دییینه رغمن، امیرحسین روشنک، لیگ یاریشمالارینین سوروملوسو بو حاقدا بئله دئمیش:« یئنی فصلین برنامه‌لری دال با دال اولدوغو اوچون تاریخ‌لری ده‌ییشمک ایمکان‌سیزدیر. آنجاق استقلال باشگاهی دا رسمی شکیلده اویونون یوباندیریلماسینی ایسته‌مه‌میش‌دیر.»
آلوز تراکتورا قاییتماق ایسته‌مه‌ییر
اوچ هفته اؤنجه ریکاردو آلوز تراکتوردان آیریلماق ایسته‌دیینی باشگاها بیلدیرمیش‌دیر. اونون گله‌جه‌یی حاقدا فرقلی خبرلر رسانه‌لرده یایینلانمیش‌دیر. تراکتور باشگاهی‌نین سوروملو‌لاری بو حاقدا بیر بیلدیری پایلاشاراق آلوزین آیریلماغینا مانع اولاجاق‌لارینی دئمیش‌لر. محمدرضا زنوزی‌نین دئدیک‌لرینه گؤره بو اویونچو تراکتورلا اوچ ایللیک سؤزلشمه یازمیش‌دیر. آنجاق بو اویونچو تیمدن آیریلماق اوچون اصرارلی‌دیر. او تراکتورون صفحه‌سین اینستاگرام حسابیندا آنفالو ائدره‌ک تراکتورون آدینی بیوسوندان دا سیلمیش‌دیر.
تراکتور خاریجی قاپیچیلا دانیشیر
تراکتور باشگاهی علیرضا بیرانوندین پرونده‌سی‌نین سونوجونو نظرده آلاراق بو قاپیچی‌نین یئرینده داروازادا دورابیلن باشقا بیر اویونچو آختارماق‌دادیر. محمدرضا زنوزی بو گونکو دانیشیغیندا خاریجی قاپیچیلا دانیشدیق‌لارینی تأیید ائدره‌ک بئله دئمیش‌دیر:« بیز اوچ فرقلی کاپ دا یاریشاجاغیق؛ او اوزدن یاخشی قاپیچی آختاریریق. بیرانوند محروم اولماسا دا مصدوم اولدوغو زامان بیز او اولمادان نه ائده‌جه‌ییک؟ اونون یئرینده دایانابیلن بیر قاپیچی بیزه لازیم‌دیر. اسکوچیچ اَلده اولان سئچه‌نک‌لری آراشدیرماق‌دادیر.»
کد خبر 5931
