هر آخشام تورکجه ورزش اوخو (330)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
سپاهان آلوزله دانیشق آپاردیغینی دانیمیش
بو گون ریکاردو آلوزله سپاهان باشگاهی‌نین آنلاشدیغی حاقدا خبرلر یایینلانمیش‌دیر. آنجاق بو باشگاهین سوروملو‌لاری بو خبرین یالان اولدوغونو بیلدیرمیش‌‌لر. سپاهان باشگاهی‌نین مودورلریندن بیری بو مسئله حاقدا بئله دئمیش‌دیر:« سپاهان تکجه مهاجم پستوندا اویونچو آلاجاق‌دیر. باشقا پست‌لاردا اویونچو آلمایاجاغیق. ایسته‌دییمیز اویونچولاری دا بو گونه قده‌ر آلمیشیق». بو سؤزلره گؤره باشگاه حمله خطینی گوجلندیرمک ایسته‌ییر. اونلار باشقا پست‌لاردا یئنی اویونچو آلماق ایسته‌مه‌‌ییرلر.
ریکاردو آلوزین ویداع نامه‌سی
«بو گون تراکتور باشگاهیندا اوچ ایل اونودولماز گون‌لر کئچیردیکدن یولون سونونا چاتدیق. من بئله بیر ویداع گؤزله‌مه‌ییردیم آنجاق فوتبال انصاف‌سیزدیر. من اَلیمدن گَلنی اسیرگه‌مه‌دیم. فخرله تراکتورون کؤینه‌یی اوچون ساواشدیم. هابئله اونلارین آماج‌لارینا سایغی‌لا یاناشدیم. آنجاق بیر سیرا اینسان‌لار منه سایغی گؤسترمه‌دیلر. اونلارا گؤره آرتیق تراکتوردا قالابیلمه‌دیم. آنجاق یاشادیغیم گؤزل آنلار هر زامان منیمله قالاجاق‌دیر. هوادارلارلا آرامیزدا اولان ایلگی درین و اونودولماز‌دیر. ایندی ایسه ایشینی سئون بیر اینسان اولاراق یولوما داوام ائتمک ایسته‌ییرم.»
عارف‌ین ۱۲۰ میلیاردلیق سؤزلشمه‌سی
عارف آقاسی تراکتورون کئچن فصلی‌نین اویونچوسو استقلال تیمینه قوشولموش‌دور. محمدرضا زنوزی‌نین دئدیک‌لرینه گؤره بو اویونچو سؤزلشمه‌لرین آراسیندا اولان فرقلی‌لیک‌لردن دولایی استقلالا گئتمیش‌دیر. او بو حاقدا بئله دئمیش‌دیر:« بیزیم تیم‌ده ۴۰-۴۵ میلیاردان یوخاری سؤزلشمه یوخدور. رقم‌لر قونوسوندا بیزیم بیر سیرا محدودیت‌لریمیز واردیر. عارف‌ین ایسته‌دییی پول بیزیم سؤزلشمه‌لرین ایکی قاتیندان دا یوخاری‌ایدی. استقلال‌دان آلدیغی پول ۴۰٪ بیزیم سؤزلشمه‌لرین رقمیندن یوخاری‌دیر». زنوزی‌نین سؤزلرینه گؤره عارف‌‌له استقلالین سؤزلشمه‌سی ۱۲۰ میلیاردلیق‌دیر.
بیرانوند اوچون پرسپولیس‌ده اختلاف وار!
بو گون‌لر تراکتورلا پرسپولیس بیرانوندین پرونده‌سی حاقدا دانیشیق آپارماق‌دادیر‌لار. دئییلن‌‌لره گؤره تراکتورچولار پرسپولیسه اویونچو وئرمک یوخ پول وئرمک ایسته‌ییرلر. آنجاق پرسپولیس‌چی‌لر بیر سیراسی بو ایشی قبوللانماییرلار. اونلار پول ایله راضی‌لاشمیرلار. بیر سیرا پرسپولیس‌چی ده بیرانوندین پرونده‌سی‌نین باغلانماسی‌نین قارشیلیغیندا پول آلماق‌لا راضی‌لاشیرلار. پرسپولیسین مودورلری آراسیندا دا بو مسئله اوستونده چاتیشمالار واردیر. مودورلرین بیر سیراسی بیرانوندین محروم اولماسین ایسته‌ییرلر. بیر سیراسی دا پول آلاراق پرونده‌نی باغلاماق پئشینده‌دیرلر. مودورلرین بیر نئچه‌سی ده تکجه تراکتورون اولدوزلارینی آلماق‌لا راضی‌لاشیرلار.
کد خبر 5936
