هر آخشام تورکجه ورزش اوخو (331)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
تیبورون اخطاری حریف‌لری اوچون
تراکتور تیمی بو گونه قدر تورکییه اوردوسوندا اوچ حاضیرلیق اویونو کئچیرمیش‌دیر. هر اوچ اویون دا باشاری‌لا باشاچاتمیش‌دیر. بو آرادا تیبور حالیلوویچ، کروات هافبک، اوچ اویون‌دا اوچ قول وورموش‌دور. او اوزدن چوخ‌لارینین دیققتینی چکمیش‌دیر. تیبور بیرینجی یاریشمادا سیواس اسپور تیمینه ایکی قول وورموش‌دور. آنجاق ایکینجی یاریشما دا قول وورابیلمه‌میش‌دیر. اوچونجو یاریشما دا سریک اسپورون داروازاسین آچاراق اوچونجو قولون وورموش‌دور. حالیلوویچ یئنی فصل‌ده تراکتورون اومید‌لریندن ساییلیر.
تراکتور ترابی‌نی پرسپولیسه وئرمه‌یه‌جک
بیرانوندین پرونده‌سی حاقدا یایینلانان سون خبرلره گؤره پرسپولیس باشگاهی رضایت وئرمک قارشیسیندا تراکتورون اویونچولاریندان بیرینی ایسته‌ییر. اونلارین آماجی مهدی ترابی‌دیر. آنجاق ترابی تراکتورلا چالیشماق‌دان موتلودور. کئچن گون رضا درویش بو حاقدا بئله دئمیش‌دیر:« تراکتورلا پرسپولیسین آنلاشما یولو تکجه مهدی ترابی‌دیر. او تبریزده یاشاماق‌دان چوخ دا موتلو دئییل». آنجاق بو اویونچو پرسپولیسین اصرارلارینا رغمن تراکتوردان آیریلماق ایسته‌مه‌ییر. محمدرضا زنوزی باشقا بیر یئرده ترابی حاقدا اؤنملی بیر سؤز دئمیش‌دیر:« مهدی ترابی فوتبال دؤورونو تبریزده بیتیره‌جک‌دیر».
پرسپولیس-تراکتور؛ انتقام اویونو
تراکتورلا پرسپولیسین یاریشماسی کئچن فصل‌ین اؤنملی اویون‌لاریندان‌ایدی. تراکتور باشگاهی پرسپولیسین اوچ اویونچوسونو آلدیقدان سونرا بو تهرانلی تیمین هوادارلاری یاریشمالاردا استادیومون دورومون قاریشدیرماق‌لا اویونو بو اوچ اویونچو اؤزللیکله بیرانوند اوچون چتین‌لشدیرمیش‌لر. یئنی فصل‌ده بو ایکی تیم ۹-جو و ۲۴-جو هفته‌لرده قارشیلاشاجاق‌لار. بیرینجی یاریشمانی تراکتور ، ایکینجی یاریشمانی دا پرسپولیس میزبانلیق ائده‌جک. آنجاق انضباطی کمیته‌نین حؤکمونه گؤره بو ایکی تیمین اویون‌لاری ایکی فصل هوادارلار اولمادان کئچیریله‌جک.
تراکتورون سورگون‌لویو
سوپرلیگانین بیرینجی یاریشماسیندا تراکتورلا استقلال تیم‌لری گؤروشه‌جک‌لر. میزبانلیغین پوشکو تراکتورا دوشسه‌ده انضباطی کمیته‌نین حؤکمونه گؤره بو یاریشمانین تبریزده کئچیریلمه‌سی ایمکان‌سیزدیر. بو حؤکم کئچن فصل تراکتور-نساجی یاریشماسیندا سونرا تراکتورا وئریلمیش‌دیر. بو حؤکمه گؤره تراکتور میزبانلیق امتیازینی یاریشمالارینین بیرینده اَلدن وئرمیش‌دیر. آنجاق باشگاه یاریشمانی کئچیرمک ایسته‌دییی استادیوم حاقدا آچیقلاما وئرمه‌میش‌دیر. یادگار استادیومو دا هله‌لیک چمن ده‌ییشمک سوره‌جینده اولدوغو اوچون تراکتورون اویون‌لاری اوچون حاضیر دئییل. او اوزدن بو تیمن یاریشمالاریندان بیر نئچه‌سی باشقا یئرده کئچیریلمه‌لی اولابیلر.
باشاری: موفقیت
قول: گل
اویون: بازی
یئنی : جدید
یاریشما: رقابت ، مسابقه
آنلاشماق: توافق کردن
دؤور: دوره
اؤنملی: مهم
دوروم : موقعیت
قارشیلاشماق: روبرو شدن
سورگونلوک: تبعید
باشقا: دیگری
آچیقلاما:توضیح
سوره‌ج: فرآیند
کد خبر 5943
