هر آخشام تورکجه ورزش اوخو (332)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
تراکتورچولارین بؤیوک چاغیریشی
اؤلکه‌نین سوپرجام یاریشماسی، دوشنبه گونو مرداد آیی‌نین ۲۰-جی گونو تراکتورلا استقلال تیم‌لری آراسیندا اصفهانین نقش جهان استادیوموندا کئچیریله‌جک‌دیر. تراکتورچولار بو دوروم‌دا دا تیم‌لرینی یالنیز بوراخماق ایسته‌مه‌ییرلر. سانال اورتامی آراشدیراراق آذربایجانین فرقلی شهرلریندن اصفهانا گئتمک اوچون قوشولان تورلاری گؤرمک اولور. بو گونه قدر یاخلاشیق ۵۰ سایی‌دان یوخاری چاغیریش وئریلمیش‌دیر. بئله‌لیکله نقش جهان استادیومونون سکی‌لری‌نین یوزده دوخسانی تراکتورچولارین اَلینده اولاجاق‌‌دیر.
کیم تراکتورلا استقلالا میزبانلیق ائده‌جک؟
تراکتورلا استقلال تیمی سوپرلیگانین بیرینجی هفته‌سینده یاریشاجاق‌لار. بو اویون‌دا سوپرلیگ ایله حذفی کاپین قهرمانی قارشیلاشاجاق‌لار. میزبانلیق پوشکو تراکتورا دوشسه‌ده انضباطی کمیته‌نین حؤکمونه گؤره بو یاریشما باشقا شهرده کئچیریلمه‌لی‌دیر. امیرحسین روشنک، لیگ قورومونون سوروملوسو، بو مسئله حاقدا بئله دئمیش‌دیر:« تراکتورون بیرینجی یاریشماسی‌نین میزبانلیغیندان محروم‌دور. او اوزدن بو یاریشما تبریزدن اوزاق بیر یئرده کئچیریلمه‌لی‌دیر». تراکتور بو یاریشمانی کئچیرمک اوچون قزوین ایله مشهد شهرلرینی اؤنرمیش‌دیر. اونلار سون توتوم‌لارینی یاخین زامان‌دا لیگ قورومونا بیلدیرمه‌لی‌دیرلر.
قهرمانی تانیتدیران اویون‌لار
سوپرلیگانین ایلک هابئله اورتا هفته‌لرینده تراکتور، سپاهان، استقلال، پرسپولیس تیم‌لرینین آراسیندا کئچیریلن اویون‌لار لیگین قهرمانلیغی‌نی قازانان تیمی تانیتدیرابیلر. بیرینجی هفته‌ده تراکتورلا استقلال تیمی یاریشاجاق‌لار. ایکینجی هفته‌ده سپاهان‌لا پرسپولیس تیم‌لری قارشیلاشاجاق‌لار. دؤردونجو هفته‌نین یاریشماسیندا سپاهان‌لا تراکتور تیم‌لری گؤروشه‌جک‌لر. دوققوزونجو هفته تراکتور تبریزده پرسپولیس تیمینه میزبانلیق ائده‌جک. اونونجو هفته استقلال سپاهان تیم‌لری یاریشاجاق‌لار. اون‌ایکینجی هفته‌ده ده استقلال پرسپولیس تیم‌لری مئیدانا گئده‌جک‌‌لر. بو یاریشمالاردا بالاجا بیر یانلیش‌لیق قهرمانلیق کورسون‌دا ده‌ییشیک‌لیک یارادابیلر.
بیر پرسپولیس‌چی مظفرین باشینا سو توکدو
سانال اورتام‌‌دا سعید مظفری‌زاده ایله پرسپولیس‌چی بیر شخصین ویدئوسو یایینلانمیش‌دیر . بو ویدئو دا پرسپولیس تیمی‌نین هوادارلاریندان بیری بیر دبه سویو تراکتورون باش مودورو، سعید مظفری‌زاده‌‌نین باشینا توکموش‌دور. بو شخص سویو تؤکرکن مظفری‌زاده‌یه بئله بیر سؤزلر ده دئمک‌ده‌دیر:« پرسپولیس تراکتوردان داها یاخشی‌دیر». آنجاق مظفری‌زاده بو هوادارین ایشی هابئله سؤزلرینی اؤنمسه‌مه‌دن یولونا داوام ائتمیش‌دیر. اونون بو تپکی‌سی چوخ‌لارینین ماراغینی چکمیش‌دیر.
چاغیریش: فراخوان
یاریشما: رقابت
دوروم: موقعیت، وضعیت
یالنیز: تنها
آراشدیرماق: بررسی کردن
سوروملو: مسئول
قوروم: سازمان
توتوم: تصمیم
اؤنرمک: پیشنهاد دادن
تپکی: واکنش
ماراقلی اولماق: علاقه‌مند بودن
کد خبر 5948
