هر آخشام تورکجه ورزش اوخو (334)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
تراکتورون هله مجوز آلابیلمه‌میش
استقلال، آلومینیوم اراک ، پیکان تهران، شمس‌آذر قزوین ، گل‌گهر سیرجان تیم‌لری اویونچولارینین سؤزلشمه‌لرینی ثبت ائتمک اوچون فوتبال فدراسیونوندان مجوز آلمیش‌‌لار. آنجاق سوپرلیگانین باشقا باشگاه‌‌لاری بورجلو اولدوق‌لاری اوچون ویاخود سندلرینده اولان اَسکیک‌لیک‌لردن دولایی سؤزلشمه‌لرینی رسمی شکیلده ثبت ائتمک اوچون بیر سیرا سورون‌لارلا اوزاوزه اولموش‌لار. لیگ قورومو سند‌لر، اویونچولارین دورمو هابئله آلیش وئریش‌لر بؤلومونو آراشدیردیقدان سونرا بو مجوزلری وئرمیش‌دیر.
سونگونون ایکینجی قازانجی
ورزقانین مس‌سونگون تیمی فوتسال سوپرلیگاسی‌نین ایکینجی هفته‌سینده ائولریندن اوزاق‌دا کئچیریلن بیر یاریشمادا حریف‌لرینی دؤرد ایکی‌یه اودموش‌لار. اونلار بهشتی‌سازه گرگان تیمی‌نی اوداراق ایکینجی اوغورلارینی قازانمیش‌لار. سونگونون قول‌لارینی، مهدی مهدی‌خانی( ایکی قول) ، محمدرضا سنگ‌سفیدی، مهدی رستمی‌ها وورموش‌لار. مس بو ترکیب‌له حریفین قارشیسیندا دورموش‌دور: مهدی رستمی‌ها، محمدرضا سنگ‌سفیدی، بهروز عظیمی، مهدی مهدی‌خانی، سجاد یوسف‌خواه
مظفری؛ میللی رسانه بو ایش‌لرین یئری دئییل
بو گون میللی رسانه‌ده بیرانوندین پرونده‌سی حاقدا یئنه ده اساس‌سیز خبرلر یایینلانمیش‌دیر. سعید مظفری‌زاده تراکتور باشگاهی‌نین رسمی رسانه‌سی‌له بو حاقدا دانیشمیش‌دیر:« بیرانوندین پرونده‌سی حاقدا باشگاها هئچ بیر بیلدیری گلمه‌‌دن میللی رسانه‌نین بیر سیرا آپاریجی‌لاری جانلی یایین‌دا کیشی‌سل نظرلرینی اورتایا قویموش‌لار. میللی رسانه طرف‌سیز بیر شکیلده بو مسئله‌یه یاناشمالی‌دیر. آنجاق اونلارین کیشی‌سل سورون‌لاری ایش‌لرینه ائتکی بوراخماق‌دادیر. بیر قضایی پرونده حاقدا بئله نظر بیلدیرمه‌لر اؤلکه‌نین قضا سیستمی‌نی تهدیدائدیر. اونلارین تکجه آماجی بیر تیمی آشاغیلاماق‌دیر. فدراسیون بو مسئله‌یه جیددی شکیلده تپکی گؤسترملی‌دیر».
خداداد؛ پرسپولیس‌ین ایسته‌یی گولونج‌دور
خداداد عزیزی تراکتور باشگاهی‌نین مودورو بو گون اؤزل بیر رسانه ایله دانیشیق‌دا بیرانوندین پرونده‌سی‌نین دورومو حاقدا اؤز نظرینی بیلدیرمیش‌دیر:« بیرانوند محروم اولارسا بیز یئنی بیر قاپیچی آلاجاغیق. آنجاق ایندی پرونده‌نین سونوجونو گؤزله‌مه‌لییک. بو حؤکمو کئچن ایل وئرسه‌ایدیلر ایندی هر شئی بیتمیش اولاجاق‌ایدی. بیزیم فیکریمیزجه بیرانوند حاقلی‌دیر. او اوزدن انضباطی کمیته‌نین حؤکمونو گؤزله‌ییریک. ترابی و یاخود اسماعیلی‌فر کیمی اویونچولار تراکتوردا قالماق ایسته‌ییرلر. بیز نه‌دن بو اویونچولاری پرسپولیسه وئرمه‌لییک؟! بئله سؤزلر بیزیم اوچون اؤنملی دئییل».
باشقا: دیگر
سؤزلشمه: قرارداد
سورون: مشکل
بؤلوم: بخش، قسمت
آراشدیرماق: بررسی کردن
یاریشما: رقابت، مسابقه
تپکی: واکنش، عکس‌العمل
کیشی‌سل: شخصی
گولونج: خنده‌دار
اؤنملی: مهم
قاپیچی: دروازه‌بان
یئنی: جدید
آپاریجی: مجری
کد خبر 5961
