هر آخشام تورکجه ورزش اوخو (337)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
تراکتور استقلالا هایجک وورماق ایسته‌ییر
ویستنه گوایتا ۳۸ یاشلی، اسپانیالی قاپیچی ، کئچن فصل لالیگادا اویون اوینامیش‌دیر. استقلال باشگاهی بو قاپیچی‌نی آلماق اوچون چوخ ماراق‌لی‌دیر. ساپینو آنتونیو آدان‌دان علاوه بو اویونچونو دا تیمه گتیرمک ایسته‌ییر. آنجاق تراکتور باشگاهی دا بو اویونچونو آلماق پئشینده‌دیر. بیرانوندین محروم اولدوغو اوچون تراکتور باشگاهی اوروپالی بیر قاپیچی آختارماق‌دادیر. بو قاپیچی دا اونلارین سئچه‌نک‌‌لریندن بیری‌دیر. تراکتور گوایتانی تیمه گتیرمک اوچون حاضیرلیق‌لارا باشلامیش‌دیر .
اخباری زنوزینین جاوابین وئردی
ریکاردو آلوز تراکتوردان آیریلدیقدان سونرا، محمدرضا زنوزی بیر دانیشیق‌دا، محمدرضا اخباری‌دن آلوزی تحریک ائتدییی اوچون شکایت ائتمیش‌دیر. اخباری‌ده زنوزینین دانیشق‌لارینی بئله جاوابلامیش‌دیر:« تراکتورون سوروملولوغو زنوزینین اَلینده اولان زامانا قدر تبریزی هابئله تراکتورون طرفدارلارینی چوخ سئودیییمه رغمن من بو تیمه قاییتمایاجاغام. نئچه گون اؤنجه ریکاردو آلوزله دانیشیردیم. تراکتوردا اونا قارشی پیس داورانیش‌لار اولموش‌دور. اونو چوخ اینجیتمیش‌‌لر. آلوز تراکتورون کؤینه‌یی ایله فوتبال ایله وداع‌لاشماق ایسته‌ییردی. آنجاق گؤرون اونون باشینا نه گتیردیلر تراکتوردان آیریلماق ایسته‌دی».
شجاع بیرونون آرخاسیندا دوردو
تراکتورون کاپیتانی، شجاع خلیل‌زاده، بیرانوندین دؤرد آیلیق محرومیت حؤکمو گلدیکدن سونرا بو مسئله‌یه تپکی گؤسترمیش‌دیر. او اینستاگرام صفحه‌سینده جواد خیابانی‌نی بیرانوندین علئیهینه دانشدیغی اوچون تنقید ائتمیش‌دیر. شجاع بو حاقدا بئله یازمیش‌دیر:« بیرانوندین حؤکمو گلدیکدن سونرا دینجلدینیز؟ ». اونون نظرینه گؤره خیابانی میللی رسانه‌ده اؤزل آماج‌لارلا قوناق‌لارینی چاغیرمیش‌دیر. کاپیتان سؤزلرینین داوامیندا وورغولامیش‌دیر:« بو سیزین اویون مئیدانینیز دئییل. کئچمیشه تای بارا وئرمک‌لرینیزه داوام ائدین. میللی رسانه‌نین سیزین اَل‌لرینیزه دوشمه‌سی تأسف وئریجی‌دیر».
پرسپولیسین شکایتی رد ائدیلدی
پرسپولیس باشگاهی علیرضا بیرانونددن علاوه تراکتور باشگاهیندان دا شکایت ائتمیش‌دیر. اونلارین نظرینه گؤره بیرانوند تراکتور باشگاهی‌نین تحریکی ایله سؤزلشمه‌سینی بیر طرفلی اولاراق پوزموش‌دور. آنجاق استیناف کمیته‌سی‌نین آراشدیرمالارینا گؤره تراکتور باشگاهی بیر آی بیرانوندین سؤزلشمه‌سینی پوزماق تاریخیندن سونرا بو اویونچو ایله سؤزلشمیش‌‌دیر. او اوزدن پرسپولیسین ادعاسینی تصدیق‌له‌ین هئچ بیر مدرک یوخدور. پرسپولیس باشگاهی بو ادعا ایله تراکتورو ایکی فصل آلیش وئریش‌دن محروم ائتمک ایسته‌ییردی. آنجاق آماج‌لارینا چاتمامیش‌لار.
قاپیچی: دروازه‌بان
ماراق‌لی: علاقمند
سئچه‌نک: گزینه
بیر شئی‌ین پئشینده اولماق: دنبال چیزی بودن
سوروملو: مسئول
اؤنجه: قبل
اؤزل: ویژه
وورغولاماق: تاکید کردن
سؤزلشمه: قرارداد
آراشدیرماق: بررسی کردن
بیر شخص‌ین آرخاسیندا دورماق: حمایت کردن، پشتیبانی کردن
کد خبر 5974
