هر آخشام تورکجه ورزش اوخو (340)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
تراکتورون قهرمانلیغی یئرینده‌دیر
فوتبال فدراسیونونون باشچی‌سی‌نین دئدییینه گؤره بیرانوندین حؤکمو تراکتورون قهرمانلیغی‌نی ائتکی‌له‌یه‌بیلمز. جمشید نورشرق، علیرضا بیرانوندین پرونده‌سی هابئله اونون محروم اولماسی‌نین تراکتورون قهرمانلیغینا نه ائتکی‌لر بوراخابیله‌جه‌یی حاقدا بئله دئمیش:« بو مسئله اونلارین قهرمانلیغی ایله ایلگی‌سیزدیر. انضباطی محرومیت‌لر اعلان ائدیلن زامان‌دا ایجرا ائدیلمه‌لی‌دیرلر. بو حؤکم‌لر استیناف کمیته‌سی‌نین رأیی گلمه‌دیکدن اؤنجه ایجرا اولابیلمزلر. او اوزدن تراکتورون قهرمانلیغیندا هئچ بیر سورون یوخدور.»
پرسپولیس عیرق‌چی‌لیک باتاق‌لیغیندا
تراکتور باشگاهی یئنی بیر بیلدیری‌ده تهرانین پرسپولیس باشگاهیندان عیرق‌چی‌لیک ائتدیک‌لری اوچون شکایت ائده‌جه‌یینی بیلدیرمیش‌دیر. پرسپولیس‌چی‌لر کئچن فصل‌ین یاریشمالاریندا عیرق‌چی شعارلار وئرمیش‌لر. او اوزدن تراکتور باشگاهی بو مسئله‌نی یاسال مرجع‌لره تاپشیرماق ایسته‌ییر. تراکتورچولارین نظرینه گؤره پرسپولیس‌چی‌لر بو شعارلارلا توهین‌دن علاوه فیفانین یاسالارینی دا پوزموش‌لار. تراکتور باشگاهی سون بیلدیریسینده بو مسئله حاقدا اَل‌لرینده اولان سندلره ده توخونموشدور. اولوس‌لارآراسی مرکزلر بئله مسئله‌لرله داها دیققتلی یاناشدیق‌لاری اوچون آغیر بیر جزا پرسپولیس‌چی‌لری گؤزله‌ییر.
بیرو تراکتورون کؤینه‌یی ایله گؤروندو
بو گون تراکتورون اویونچولاری طیبی تست‌لرینی کئچیرمک اوچون ایفمارکا گئتمیش‌لر. اؤنجه‌کی گون‌لر علیرضا بیرانوندین تراکتوردان آیریلماق ایسته‌دییی حاقدا شایعه‌لر یایینلانمیش‌دیر. بو گون صوبح چاغی بیرانوند ایفمارک‌دا گؤرونمه‌دییی اوچون بو شایعه‌لر داها دا چوخالمیش‌دیر. آنجاق سونون‌دا بیرانوند تراکتورون کؤینه‌یی ایله طیبی تست‌لرینی کئچیرمیش‌دیر. دئمک بو قاپیچی تراکتورون کؤینه‌یی ایله گؤروندویو اوچون بو شایعه‌لر ده آرادان قالدیرمالی‌دیر. بیرانوند آذر آیی‌نین ۲۰-جی گونونه قدر مئیدان‌لاردان اوزاق اولاجاق‌دیر.
شجاع‌نین ایییرمی یاشلی اوره‌یی
کئچن فصل شجاع خلیل‌زاده تراکتورون دفاع خطینده چوخ اؤنملی رول اوینامیش‌دیر. او دفاع خطینی یاخشی‌جا قورویاراق بیرانونده قیزیل ال‌جک‌لری قازانماق اوچون یاردیمجی اولموش‌دور. باشقا اویونچولارا گؤره داها حاضیرلیقلی اولدوغو اوچون دراقان اسکوچیچ اونون یئرینی عارف غلامی ویاخود علیرضا آرتایا وئرمک ایسته‌مه‌میش‌دیر. اونون یاشی چوخ اولدوغونا رغمن فیزیکسل باخیمیندان گوجلودور. عارف آقاسی تیمدن آیریلمیش‌دیر. او اوزدن یئنی فصل‌ده اونون ایشی دا چتین اولابیلر. آنجاق شجاع‌نین دئدییینه گؤره ایییرمی یاشیندا بیر گنج کیمی اویون اوینماق اوچون حاضیردیر.
سونگون اوچ-هئچه گهرزمینی اودموش
فوتسال سوپرلیگاسی‌نین اوچونجو هفته‌سینده مس سونگون تیمی اؤز قوناغینی یاخشی بیر اویون‌لا اودموش‌دور. اونلار بو گون ساعات ۱۷-ده گهرزمین سیرجان تیمی‌نی اوچ- هئچه اودموش‌لار. کاپیتان فرهاد فخیمین سونگونه قاییتماغی بو یاریشمانین اؤزل یانلاریندان بیری‌ایدی. یاریشمانین ایلک بؤلومو هئچ- هئچه باشا چاتمیش‌دیر. آنجاق ایکینجی بؤلوم‌ده فرهاد فخیم گؤزل بیر ضربه ایله تیمین ایلک قولونو وورموش‌دور. بیر پنالتی ده سونگونون نفعینه توتولموش‌دور. آنجاق امیرحسین تقوی بو پنالتی‌نی قولا وورابیلمه‌میش‌دیر. مهدی جاوید ده سونگونون ایکینجی پنالتی‌سینی الدن وئرمیش‌دیر. آنجاق سون دقیقه‌لرده بهروز عظیمی ایلع مجتبی پارساپور ایکی قول وورموش‌لار.
عیرق‌چی‌لیک: نژادپرستی
یاسال: قانونی
اولوس‌لارآراسی: بین‌المللی
بیلدیری: اطلاعیه
اؤنجه: قبل
بؤلوم: پارت، قسمت
یاریشما: رقابت، مسابقه
ایلک: اول، ابتدا
اؤزل: ویژه، خاص
یئنی: جدید، تازه
اؤنملی: مهم
باشقا: دیگر
باتاق‌لیق: باتلاق
کد خبر 5989
