هر آخشام تورکجه ورزش اوخو (348)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
اَسکی قول ووران هله دیری‌دیر
تومیسلاو اشترکالی سوپرجام یاریشماسیندا پارلامیش‌دیر. او سورعت‌له آرمین سهرابیان‌دان قاباغا کئچمک‌له آنتونیو آدانین داروازاسین آچمیش‌دیر. تومی اویونون سونوجونو بیر باجاریقلی اووچو کیمی ده‌ییشمیش‌دیر. بو اویونچو ۱۹۳ گوندن سونرا قول وورماغی باجارمیش‌دیر. او اَن چوخ قول ووران اویونچو دا اولابیلردی آنجاق بیردن بیره بو آماج‌دان اوزاق‌‌لاشمیش‌دیر. اشترکالی کئچن فصل تیمین تمل ترکیبینده ده یئرینی اَلدن وئرمیشدیر. آنجاق سوپرجام‌دا ۱۲-جی قولونو استقلالین داروازاسیندا یئرلشدیرمیش‌دیر.
اوزمان‌لار نظری تراکتور-استقلال یاریشماسینا
استقلال ایله تراکتور تیم‌لری مرداد آیی‌نین ۲۰-جی گونو سوپرجام یاریشماسیندا قارشیلاشمیش‌لار. نوذر رودنیل فوتبال اوزمانی بو یاریشمانین حاکیمی، وحید کاظمی‌نین قضاوتی حاقدا نظرینی بیلدیرمیش‌دیر:« اویونون بیرینجی یاریسیندا هر شئی دوزایدی. روزبه چشمی‌نین آلدیغی ساری کارت دا دوزایدی. آنجاق ۷۶-جی دقیقه‌ده یئنی‌دن ساری کارت آلمالی‌ایدی. هابئله مئیدان‌دان چیخاریلمالی‌ایدی. ۸۰-جی دقیقه‌ده حاکیم یاخشی دوروم‌دا دایانمادیغی اوچون پنالتی صحنه‌سینی اَلدن وئرمیشدیر. هابئله ۱۱ دقیقه علاوه زامان یانلیش‌جا توتولموش‌دور. منجه سورون تکجه اونلارین قضاوت‌لرینده دئییل. بیر سیرا حاکیم‌لر فیزیکسل باخیمدان بو ایش اوچون حاضیر دئییل‌لر».
سپاهان شکایت‌دن قاچماق ایسته‌ییر
ریکاردو آلوز سپاهانا قوشولدوقدان سونرا ترلکتور باشگاهی فیفایا شکایت آپارمیش‌دیر. بیر سیرا رسانه‌لرین دئدیک‌لرینه گؤره سپاهان باشگاهی یانلیش‌لیق‌لا آلوزله سؤزلشمه یازمیش‌دیر. تراکتور ایسته‌دییی زامان سپاهان‌دان شکایت ائده‌بیلر. آنجاق اصفهانلی تیمین باش مودورو تراکتور باشگاهی ایله آنلاشماق اوچون چالیشماق‌دادیر. منوچهر نیکفر تورک اولدوغو اوچون هابئله تراکتور باشگاهیندا بیر سیرا یولداش‌لارینین واسیطه‌سی ایله تراکتورون مودورلرینین گؤیلونو آلماق ایسته‌ییر. لیگ قورومو آلوزین اویون کارتی‌نی تراکتورون آدینا یازمیش‌دیر. اونلارین نظرینه گؤره ریکاردو آلوز هله ده تراکتورون اویونچوسو ساییلیر. پوشک آتماق تؤره‌نی مرداد آیی‌نین ۲۴-جو گونو کئچیریله‌جک‌دیر.
تراکتورون حریف‌لری آسیا داهی‌لر لیگاسیندا
کئچن آخشام سپاهان قطرین الدحیل تیمینه اودوزدوقدان سونرا باتی آسیانین تیم‌لرینین دورومو بللی اولموش‌دور. تیم‌لر پوشک آتما تؤره‌نی اوچون حاضیرلانیرلار. بیرینجی سیدده تراکتور، الاهلی عربستان ، شباب الاهلی امارات، السد قطر، نسف قارشی، عراق‌دان الشرطه تیم‌لری واردیرلار. ایکینجی سیدده ده عربستان‌دان الاتحاد ، الهلال، امارات‌دان الشارجه، الوحده، قطردن الدحیل، الغرافه تیم‌لری حاضیردیرلر. تراکتورون ایکی حریفی بللی اولموش‌دور. ازبکستان‌دان نسف قارشی هابئله عراق‌دان الشرطه تیم‌لری تراکتورون کسین حریف‌لری ساییلیرلار. آسیا داهی‌لر لیگاسی باتی و دوغو بؤلگه‌لرینده، هر بؤلگه‌ده ۱۲ تیم‌له کئچیریله‌جک‌دیر.
اَسکی: قدیمی
قول: گل
یاریشما: رقابت، مسابقه
سونوج: نتیجه
اوزمان: کارشناس
یانلیش: اشتباه
سورون: مشکل
دوروم: موقعیت، وضعیت
سؤزلشمه: قرارداد
قوروم: سازمان
پوشک آتماق: قرعه کشی
داهی‌لر لیگاسی: لیگ نخبگان
تؤره‌ن: مراسم
بؤلگه: منطقه
کد خبر 6041
