سونگونون والیبال تیمی سوپرلیگه قوشولمادی

مس‌سونگون والیبال تیمی‌نین دورومو سون آی‌لاردا یاخشی دئییل. باشگاهین مودورلری هوادارلارا سوپرلیگایا قوشولماق اوچون سؤز وئرمیشودیرلر. هابئله سعید معروف کیمی بؤیوک اویونچولارلا دانیشیق آپارماق‌لارا چوخ دیققت چکمیش‌دیرلر. آنجاق اونلار سؤزلرینی توتابیلمه‌میش‌لر. اونلارین رقیب‌لری داها یاخشی بیر دورومدا کیفیتلی اویونچولار آلمیش‌لار. سونگون ایسه اویونچولارا آشاغی رقم‌ اؤنرمک‌له اونلاری اینجیتمیش‌‌لر. اوزمان‌لارین نظرینه گؤره سونگون کیمی اعتبارلی بیر تیم مالی قایناق‌لارینی گوجلندیرمه‌دن اؤنجه آلیش وئریش گون‌لرینده باشاریلی اولابیلمز.

عارف غلامی استقلالا قوشولمامیش

نئچه گون اؤنجه عارف غلامی‌نین استقلالا قوشولماسی حاقدا خبر یایینلامیش‌دیر. آنجاق بو ایش اولمامیش‌دیر. بو اویونچو استقلالین مشق‌لرینده گؤرونموش‌دور. آنجاق تیمین هوادارلاری اونون باشگاها قوشولماسینی ایسته‌مه‌میش‌لر. عارف غلامی پنجشنبه گونونون مشق‌لریندن سونرا خبرنگارلارا بئله دئمیش‌دیر:« دانیشیق‌لاریمیز باشاچاتمیش‌دیر. استقلال باشگاهی بو مسئله‌نی بیلدیره‌جک‌دیر.» آنجاق باشگاها یاخین اولان خبر قایناق‌لاری بئله دئمیرلر. اونلارین ادعاسینا گؤره استقلال ایله عارف غلامی‌نین آراسیندا هئچ بیر سؤزلشمه یازیلمامیش‌دیر. دئمک بو اویونچو ساپینتونون سؤزو ایله مشق‌لره قوشولموش‌دور. بعضی خبرلره گؤره غلامی فیزیکسل تست‌لر کئچیرمک اوچون تمرین‌لره قوشولموش‌‌موش. بو اویونچو آی‌لارجا تراکتورون نیمکتینده اوتورموش‌دور. او اوزدن چوخ‌لاری اونون حاضیرلیغینا شک آپارمیش‌لار.

ریکاردو آلوزله سپاهان‌دان نه خبر؟!

ریکاردو آلوز سون هفته‌لر تراکتورلا سؤزلشمه‌سی اولارکن سپاهانا قوشولموش‌دور. آنجاق سپاهانین ادعاسینا گؤره اونلارین سؤزلشمه‌سی تام یاسال‌دیر. آنجاق لیگ قورومو آلوزین اویون کارتی‌نی تراکتورون آدینا یازمیش‌دیر. او اوزدن آلوز سؤزلشمه‌سینی تراکتورلا پوزابیلمه‌میش‌دیر. دئییلن‌لره گؤره آلوزله سپاهانین سؤزلشمه‌سی ده هله تامام‌لانمامیش‌دیر. او اوزدن بو قونویا گؤره اونلارین هئچ بیر تپکی‌سی اولمامیش‌دیر. آنجاق آلوزین سپاهان‌لا مشق ائتمه‌سیندن شکیل‌لر یایینلانمیش‌دیر. آلوزین اویون کارتی‌نین سورون‌لاری یئرینده قالارسا بو اویونچو سپاهانین رسمی یاریشمالارینا قاتیلابیلمه‌یه‌جک‌دیر.

ترابی درویش‌دن چوخ اوزاق‌دیر

مهدی ترابی اؤلکه‌نین یاخشی فوتبالچی‌لاریندان‌دیر. تراکتور بو اویونچونو ایکینجی فصل اولاراق تیمده ساخلامیش‌دیر. پرسپولیس بوتون گوجو ایله ترابی‌نی قایتارماق اوچون چالیشمیش‌دیر. آنجاق بو اویونچو تبریزده قالماغی سئچمیش‌دیر. ایندی ایسه کئچن فصله تراکتورون قهرمانلیغی اوچون چالیشماق‌دادیر. هابئله آسیا یاریشمالارینا قاتیلماق اوچون مشق ائتمکده‌دیر. ترابی نئچه فصل پرسپولیس اوچون چالیشسادا ایندی اونلار بو اویونچونو باشگاها قایتارا بیلمه‌میش‌لر. اونون یوخلوغو میللی تیم اوچون سورون یارادابیلر. او اوزدن هامی اونون میللی قاییتماسینی گؤزله‌ییر.

دوروم: موقعیت، وضعیت

اؤنری: پیشنهاد

قایناق: منبع

اؤنجه: قبل

باشاریلی: موفق

مشق: تمرین

سؤزلشمه: قرارداد

سون: آخر، پایان

قونو: موضوع

سورون: مشکل

یاریشما: مسابقه

اؤلکه: کشور