هر آخشام تورکجه ورزش اوخو (355
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
تراکتورون بوش داماری
تراکتور سوپرلیگانین ۲۴-جو دؤورونو اَسکی بیر سورون‌لا باشلامیش‌دیر. هاوا ساواش‌لاریندا گوجسوزلوک هابئله باش‌لا ضربه ووران مهاجم‌ین اولماماسی. بو مسئله استقلالین قارشیسیندا داها چوخ گؤزه گلمیش‌دیر. سونوندا دا تراکتورون اودوزماسینا سبب اولموش‌دور. تراکتور دونن گئجه بنیان دیزل استادیوموندا استقلالین قارشیسیندا اویون اوینامیش‌دیر. آنجاق اسکوچیچ‌ین اویونچولاری حریفین داروازاسین آچابیلمه‌میش‌لر. استقلال قول ووردوقدان سونرا داها گوجلو داروازاسیندان دفاع ائتمیش‌دیر. تراکتورون ایستگاهی ضربه‌لری ده هئچ بیر ایشه یارامامیش‌دیر. اونلار هاوایی دوئل‌لرده ده باشاری‌سیزلیغا اوغرامیش‌لار. بو مسئله کئچن فصل‌دن هله ده یئرینده‌دیر.
استقلالین اعتراضی جاوابلانمیش
استقلال سوپرلیگانین ایلک هفته‌سینده تراکتورو تبریزده اودموش‌دور. اونلار بو گون بیر بیلدیری‌ده دوننکی یاریشمانین حاکیم‌لرینه اعتراض ائتمیش‌لر. استقلالین ادعاسینا گؤره حاکیم‌لر اونلارین ایکی پنالتی‌سینی توتمامیش‌لار. بو بیلدیری‌ده بئله یازیلمیش‌دیر:« اوزمان‌لارین نظرینه گؤره ۲۳-جو دقیقه‌ده تراکتورون قاپیچی‌سی سحرخیزانین اوستونه پنالتی خطاسی ائتمیش‌دیر. بیر دفعه ده سهرابیانین اوستونده پنالتی اولموش‌دور». نئچه ساعات سونرا دانیال مرادی، فوتبال فدراسیونونون حاکیم‌لر دپارتمانیندان، استقلالین بیلدیریسینه بئله جاواب وئرمیش:« تراکتور-استقلال یاریشماسیندا حاکیم‌لرینده قضاوتینده گؤزه گلن یانلیش‌لیق یوخ‌ایدی».
پرسپولیس یئنه تراکتوردان شکایت ائتدی
ایران فوتبالی‌نین استیناف کمیته‌سی علیرضا بیرانوندین پرونده‌سینده تراکتورا وورولان اتهامی رد ائتمیش‌دیر. تکجه علیرضا بیرانوند دؤرد آیلیق محروم اولموش‌دور. آنجاق پرسپولیس باشگاهی بیرانوندی داها آغیر شکیلده جزالاندیرماق هابئله تراکتورو آلیش وئریش‌دن محروم ائتمک اوچون یوکسک ورزش محکه‌مه‌سینه شکایت یازمیش‌دیر. پرسپولیس بو حاقدا بیر بیلدیری یایینلانمیش‌دیر:« حاققیمیزی آلاراق پرونده‌نین داها آیدین‌لانماسی اوچون تراکتورلا علیرضا بیرانونده قارشی CASدا شکایت ثبت ائتدیک. بو ایشیمیزله ایران فوتبالی‌نین قوروما قانونون اجرا اولونماسینا یاردیمجی اولماق ایسته‌ییریک». پرسپولیس‌ین ادعاسینا گؤره بیرانوند آلتی آی محروم اولمالی‌دیر. هابئله هشتاد میلیاردلیق جریمه اولمالی‌دیر. بوندان علاوه تراکتور باشگاهی آلیش وئریش‌دن محروم اولمالی‌دیر.
اَسکی: قدیمی
سورون: مشکل
قارشیسیندا: روبرویش
قول: گل
باشاری‌سیزلیق: عدم موفقیت
یاریشما: رقابت، مسابقه
یانلیش‌لیق: اشتباه
قاپیچی: دروازه‌بان
یاردیمجی: کمک‌کننده
بیلدیری: اطلاعیه
یایینلاماق: منتشر کردن
کد خبر 6079
