خبر ترکی:

مس سونگونون استادیومو یوخدور!

سوپرلیگانین باشلانغیجینا یاخین‌لاشماق‌دیر. آنجاق مس‌سونگون باشگاهی میزبانلیق اوچون ورزشگاه‌سیز قالمیش‌دیر. بوندان اؤنجه اونلار بنیان دیزل استادیوموندا حریف‌لرینی قارشیلاییردیرلار. آنجاق بو ایل یادگار استادیومونون پیس دورومونا گؤره بنیان دیزل تراکتورون اَلینده‌دیر. سونگون مودورلری تراکتورون مودورلری بو حاقدا دانیشمیش‌‌لار آنجاق تراکتور استادیومو سونگونه وئرمک ایسته‌مه‌میش‌دیر. تبریزین باشقا استادیوم‌لاری دا یاخشی دوروم‌دا دئییل. شهرداری‌نین مصنوعی چمنینده لیگ یاریشمالارینی کئچیرمک اولماز. باغشمال استادیومو دا لیگ قورومونون استانداردلارینا اویغون دئییل‌دیر. یئنی فصلین باشلانغیجینا چوخ آز گون قالسا دا سونگون بو سورونو چؤزه بیلمه‌میش‌دیر.

رومانییالی قولر نه‌دن اؤلکه‌سینه قاییتدی؟

تراکتور باشگاهی هله ده یئنی بیر قولر آلماق اوچون چالیشماق‌دادیر. سعید مظفری‌زاده بو حاقدا دانیشمیش‌‌دیر:« فنی کادرین نظری ایله باشقا اؤلکه‌دن قولر آلماق ایسته‌ییریک. رومانییالی قاپیچی‌نین تراکتورا قوشولماغی اوچون بوتون ایش‌لری گؤرموشدوک؛ مبدأ باشگاه تکجه نئچه دقیقه مدرک‌لری یوللاماق‌دا گئجیکمیش‌دیر. بئله‌لیکله آلیش وئریش گون‌لری بیتمه‌دن اؤنجه سؤزلشمه‌نی ثبت ائده‌بیلمه‌دییمیز اوچون بو قاپیچی اؤز اؤلکه‌سینه قاییتمیش‌دیر. رگی لوشکیا باجاریقلی اویونچودور. او مئیدانین اورتا خطینده تیمه چوخ یاردیمجی اولابیلر.‌»

ایندی اورمییه‌نین نؤوبه‌سی‌دیر

تبریزین فوتبالی ایله اورمییه‌نین والیبالی ورزش ساحه‌سینده آذربایجان بؤلگه‌سی‌نین نوماینده‌لری ساییلیرلار. اورمییه‌نین والیبال تیمی ایل‌لر بویو باجاریق‌لی والیبال اولدوزلارینی دونیایا تانیتدیرمیش‌دیر. تراکتور کئچن فصل سوپرلیگانین قهرمانلیغینی قازانمیش‌دیر.‌ بئله‌لیکه آذربایجانلی‌لارین اوره‌یینده بؤیوک بیر سئوینج یاراتمیش‌دیر. آنجاق شهرداری اورمییه تیمی یاخلاشیق اَللی ایل بیرینجی سویه والیبال لیگاسیندا چالیشدیغینا رغمن بو گونه قدر قهرمانلیغی قازانا بیلمه‌میش‌دیر. بو مسئله اونلارین هوادارلارینین اوره‌یینده حسرت یاراتمیش‌دیر. اورمییه‌نین بلدیه باشچی‌سی بوندان اؤنجه بو تیمین قهرمان اولاجاغینا سؤز وئرمیش‌دیر. آنجاق اونلار سؤزلرینی توتابیله‌جک‌‌لرمی؟

باشلانغیج: آغاز

اؤنجه: قبل

قارشیلاماق: استقبال کردن

دوروم: موقعیت، وضعیت

اویغون: مناسب

قوروم: سازمان

سورون: مشکل

باشقا: دیگر

اؤلکه: کشور

سویه: سطح

قولر: دروازه‌بان

یاردیمجی: کمک‌کننده

باشچی: رئیس

بلدیه: شهرداری