هر آخشام تورکجه ورزش اوخو (360)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
تراکتور-مس کیم قازاناجاق؟!
تراکتورلا مس رفسنجان تیم‌لری سوپرلیگانین ایکینجی هفته‌سینده سه‌‌شنبه گونو ساعات ۱۹-دا قارشیلاشاجاق‌لار. بو ایکی تیمین اویونو هر زامان چوخ قول ایله باشاچاتمیش‌دیر. اونلارین سون یاریشمالاریندا ۲۳ قول داروازالاردان کئچمیش‌دیر. بو آمارلار اینگیلتره لیگاسی‌نین آمارینا چوخ یاخین‌دیر. سون بئش یاریشمادا اوچ اویونو تراکتور قازانمیش‌دیر، بیر یاریشما دا مساوی سونوج‌لا باشاچاتمیش‌دیر. بیر اویونو دا رفسنجانلی‌لار اودموش‌لار. بو اویون‌لاردا ۱۲ قول ثبت اولونموش‌دور. ۹ قول تراکتور ۳ قول دا مس تیمی‌نین پایی‌دیر. کئچن فصل تراکتور تبریزده بئش بیره اونلاری اودموش‌دور. اوزمان‌لارین دئدیک‌لرینه گؤره تراکتورون اودماق شانسی یوزده اوتوز بئش، رفسنجانین اودماق شانسی یوزده اوتوز سککیز‌دیر.
بیرو ایییرمی اویون سونرا قاییداجاق!
بو گون‌لر علیرضا بیرانوند سس‌سیزجه تراکتورون مشق‌لرینه قاتیلماق‌دادیر. او سوپرجام هابئله لیگین بیرینجی یاریشماسینی محرومیتیندن دولایی اَلدن وئرمیش‌دیر. آنجاق مهدی تاجین دئدیک‌لرینه گؤره فیفادی گون‌لرینده ده بو قاپیچی میللی تیمین داروازاسیندا دا دورابیلمه‌یه‌جک‌دیر. او شهریورین ۲۰-جی گونوندن آذر آیی‌نین ۲۰-جی گونونه قدر یاریشمالارا قاتیلماق‌دان محروم‌دور. بئله‌لیکه آسیا داهی‌لر لیگاسیندا تراکتورون بئش یاریشماسینی اَلدن وئره‌جک‌دیر. هابئله سوپرلیگانین ۱۰ یاریشماسینا قاتیلابیلمه‌یه‌جک‌دیر. بو آرادا فیفادی اویون‌لارینی دا اَلدن وئره‌جک‌دیر. او اوزدن یاخلاشیق ایییرمی اویون سونرا اویون مئیدانینا قاییداجاق‌دیر.
تراکتورون ایکینجی و اوچونجو کؤینه‌یی
تراکتور صاباح قارا رنگلی کؤینه‌یی ایله مس‌رفسنجان‌لا قارشیلاشاجاق‌‌دیر. آنجاق اونلار اوچونجو کؤینک‌لری اوچون ساری رنگی سئچمیش‌لر. ساری رنگ بیر فصل تراکتورون لوگوسونا کئچدیکدن سونرا ایندی اونلارین کؤینه‌یینه کئچمیش‌دیر. یوخاری احتمال ایله ساری رنگ محمدرضا زنوزینین هلدینگینین رنگ تئمینه گؤره سئچیلمیش‌دیر. اونلارین ماشین‌سازی تیمینده ده بو رنگ‌ده کؤینک‌لری وارایدی. تراکتور قارا رنگی هوادارلارینین ایسته‌یینه گؤره سئچمیش‌دیر. آنجاق ساری رنگ فانتزی هابئله اوروپا تیم‌لرینین کیتینه بنزه‌ین بیر کؤینک اولموش‌دور.
اسکوچیچ؛ نیمکتیمیز دولودور
بو گون تراکتور-مس‌رفسنجان یاریشماسیندان اؤنجه کئچیریلن خبر کنفرانسیندا دراقان اسکوچیچ بو یاریشما حاقدا بئله دئمیش‌دیر:« کئچن یاریشمادا یاخشی اویون اوینامادیق. آنجاق صاباحکی یاریشما اوچون انگیزه‌میز یوخاری‌دیر. چوخ چتین بیر حریف قارشیمیزدادیر. اونلاری یاخشیجا آنالیز ائتمیشیک. مس رفسنجان یاخشی بیر تیم‌دیر. اونلار یاخشی اویونچولار آلاراق گوجلنمیش‌لر. بیزیم ده گوجلو اویونچولاریمیز واردیر. دفعه‌لرجه بونو هامییا گؤسترمیشیک. یئنی اویونچولار بیزه قوشولموش‌دور. او اوزدن اونلارین هماهنگ اولماسی بیر نئچه وقت سوره‌جک‌دیر. آنجاق کئچن فصله گؤره نیمکتیمیز دولودور. او اوزدن یاریشما سوره‌جینده اونلاری ده‌ییشه‌رک فرقلی تکنیک‌لر قوللانابیلریک.»
یاریشما: مسابقه
قارشیلاشماق: روبرو شدن
سون: آخر، پایان
قول: گل
اوزمان‌لار: کارشناسان
اویون: بازی
مشق: تمرین
قاپیچی: دروازه‌بان
داهی‌لر لیگاسی: لیگ نخبگان
اؤنجه: قبل
سوره‌ج: فرآیند
یئنی: جدید
قوللانماق: استفاده کردن
کد خبر 6108
