هر آخشام تورکجه ورزش اوخو (361)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
تراکتور نه لر ایسته‌ییر؟!
سوپرلیگانین اویون‌لاری میللی تیمین کافا یاریشمالارینا قاتیلدیغی اوچون ایکی هفته‌لیک دایاندیریلمیش‌دیر. تراکتور بو فورصتی قوللاناراق اؤزونو گلیشدیره‌بیلر. اونلار لیگین ایلک ایکی یاریشماسیندا هئچ بیر قول وورابیلمه‌میش‌لر. بیر نئچه پست‌دا تیمه یئنی اویونچو قوشولمالی‌دیر. ایلک اولاراق علیرضا بیرانوندین یئرینه یاخشی بیر قاپیچی گلمه‌لی‌دیر. بوندان علاوه تیمین حمله خطی یئترینجه گوجلو دئییل. او اوزدن بیر قول ووران مهاجم ده تیمه گَرَکلی‌دیر. تراکتور سوپرلیگدن علاوه آسیا یاریشمالاریندا دا اوینایاجاق‌دیر. او اوزدن باشگاهین فنی کادری بو سورون‌لاری آرادان قالدیرماق اوچون چالیشماق‌دادیر.
اخباری؛ آلوزین کارتی یاخین زامان‌دا گله‌جک
محمدرضا اخباری، تراکتورون اَسکی قولری هابئله سپاهان تیمی‌نین ایندیکی قولری ریکاردو آلوزین پرونده‌سی حاقدا شاشیردیجی ادعالار ائتمیش‌دیر. او تلویزیون‌دا یایینلانان بیر برنامه‌ده بو مسئله‌یه گؤره آچیقلاما وئرمیش‌دیر:« آلوزین سپاهانا قوشولماغی منیم‌له ایلگیلی دئییل‌دیر. تراکتورا گؤره دانیشماق ایسته‌مه‌ییرم. آنجاق آلوزین پرونده‌سی‌نین سونوجو چوخ‌لارینی سورپرایز ائده‌جک. یاخین زامان‌دا اونون اویون کارتی وئریله‌جک‌دیر. هابئله آلوزدن شاشیردیجی سؤزلر ده ائشیده‌جه‌ییک.»
ریکاردو آلوزین سپاهانا قوشولماسی ایران فوتبالی‌نین حاشییه‌لی مسئله‌لریندن‌دیر. آنجاق اخباری‌نین ادعاسینا گؤره بو اویونچونون کارتی سپاهان‌دا اویناماق اوچون وئریله‌جک‌دیر.
شجاع میللی تیمه چاغیریلمادی
میللی تیمه چاغیریلان اویونچولارین لیسته‌سی یایینلانمیش‌دیر. آنجاق شجاع خلیل‌زاده‌نین آدی اونلارین آراسیندا دئییل‌دی. بوندان اؤنجه خلیل‌زاده‌نین آدی هر زامان امیر قلعه‌نویی ایله دراقان اسکوچیچ‌‌ین لیسته‌سینده‌ایدی. ایندی ایسه حسین کنعانی، عارف آقاسی ، امین حزباوی، علی نعمتی اونون یئرینی آلمیش‌لار. شجاع ۳۶ یاشیندا تراکتورون دفاع خطی‌نین اؤنملی مهره‌لریندن‌دیر. بو اویونچو میللی تیمه چاغیریلمادیغینا گؤره اینستاگرام صفحه‌سینده تراکتورون میللی‌یه گئدن اویونچولارینین شکیلینی پایلاشاراق بو مسئله‌یه تپکی گؤسترمیش‌دیر. شجاع خلیل‌زاده میللی تیمین اَللی یاریشماسینا قاتیلمیش‌دیر. او کارلوس کی‌روش‌لا چاتیشماساایدی اونون اویون‌لارینین سایی‌‌سی یوزو آشمیش اولاجاق‌ایدی.
تراکتورون حریفی‌نین اولدوزو مصدوم‌دور
الدحیل باشگاهی‌نین بیلدیری‌سینه گؤره لوکاس سیلوا ملو، بو تیمین برزیل‌لی دفاع اویونچوسو دیز ناحیه‌سیندن جراحی اولونموش‌دور. او اوزدن گلن گون‌لرده درمان سوره‌جینی کئچیره‌جک‌دیر. اونون نه قدر مئیدان‌لاردان اوزاق اولاجاغی بللی دئییل. توتا آدی ایله تانینان بو اویونچو یای فصلینده آلمانین آینتراخت تیمیندن الدحیله قوشولموش‌دور. او الدحیله قوشولدوغو گوندن بری تکجه ایکی یاریشمادا مئیدانا گئتمیش‌دیر(بیری سپاهانین قارشیسیندا، بیری ایسه قطر لیگاسیندا) . الدحیل آسیا داهی‌لر لیگاسیندا تراکتورون حریف‌لریندن بیری‌دیر. ایندی ایسه بللی دئییل اونلارین برزیل‌لی اویونچوسو بو اؤنملی یاریشمایا چاتاجاق می یوخسا یوخ؟
یاریشما: رقابت ، مسابقه
گَرَکلی: حتمی، بایدی، لازم
سورون: مشکل
آرادان قالدیرماق: برطرف کردن, از میان برداشتن
قول: گل
ایلگیلی: مرتبط
شاشیردیجی: تعجب‌آور
آچیقلاما: توضیح
اویونچو: بازیکن
اؤنملی: مهم
اؤنجه: قبل
تپکی: واکنش
سوره‌ج: پروسه
کد خبر 6132
