هاشمی‌نژاد دونیا کاپی‌نین یوخوسونو گؤرور

مهدی هاشمی‌نژاد، تراکتورون اویونچوسو بو گون میللی تیمین مشق‌لرینده کافا هابئله آسیا یاریشمالاری حاققیندا دانیشمیش‌دیر :« افغانستانین قارشیسیندا یاخشی اویون اوینادیق. قلعه‌نویی‌نین تاپشیریق‌لارینی یاخشیجا یئرینه یئتیردیک. منجه هند ده یاخشی تیم‌دیر. دیققت‌له اونلارین اویون‌لارینی آراشدیرمیشیق. کئچن فصل‌دن میللی تیم‌له دونیا کاپی‌نین یاریشمالارینا گئتمک ایسته‌ییرم. فوتبال دونیانین هر بیر یئرینده گلیشمیش‌دیر. من اؤلکه‌میزین نوماینده‌سی‌یم. تراکتورلا آسیا یاریشمالاریندا باشاریلی اولماق ایسته‌ییرم. ایکینجی دفعه اولاراق میللی تیمین اوردوسونا قاتیلمیشام. تیم‌له هماهنگ اولماق اوچون یاخشی فورصت اَلده ائتمیشم.»

شهرداری اورمییه‌نین سورونو باشقا شئی‌دیر

شهرداری اورمییه باشگاهی سون بیلدیری‌سینده جهانگیر عباسی، اَسکی مشقچی‌لری‌له، آنلاشدیق‌لارینی آچیقلامیش‌دیر. اونلار یاخلاشیق بئش میلیارد(ریال) اؤده‌‌یه‌رک بو پرونده‌نی باغلامیش‌لار. آنجاق عباسی بوندان اؤنجه‌کی مودورلردن ده پول آلاراق سؤزلشمه‌سینی پوزموش‌دور. آراشدیرمالاریمیزا گؤره شهرداری‌نین آلیش وئریش‌دن محروم اولماسی عباسی‌نین شکایتی‌ ایله ایلگیلی دئییل‌دیر. بو مسئله باشگاه‌لا فدراسیونون آراسیندا اولان بورج‌لارا باغلی‌دیر. بئله‌لیکه یئنی‌دن عباسی‌یه پول وئرمک آنلامسیزدیر. بو پولو تیمین گوجلنمه‌سینه خرج خرجلمک اولاردی.

سونگون یئنی مشقچی آختاریر

مس‌سونگون فوتبال تیمی بیرینجی سویه فوتبال لیگاسی‌نین ایلک هفته‌سینده اویونچولارینین اویون کارتی‌نی آلابیلمه‌میش‌دیر. او اوزدن انضباطی کمیته‌نین حؤکمونه گؤره مئیدانا گیرمه‌دن اویونو اوچ هئچه اودوزموش‌لار. سونگونون باش‌مشقچی‌سی بو یاریشمایا گلمه‌میش‌دیر. باشگاهین مودورلری تیمی اونون کؤمکچی‌لرینه تاپشیرمیش‌لار. ابراهیمیانین مشقچی‌لیکده یاخشی تجروبه‌سی یوخدور. آنجاق ایلک یاریشمادان اؤنجه اونون تیمدن آیریلماغی شاشیردیجی‌دیر. ایندی ایسه حسن آذرنیانین آدی اونون یئرینده اوتورماق اوچون ائشیدیلیر. او دا سون دفعه اون ایل بوندان اؤنجه نیمکت‌ده اوتورموش‌دور. او زامان سونگون‌له لیگین آشاغی سویه‌سینه یئنمیش‌دیرلر.

یئنی: جدید، تازه

باش مشقچی:سرمربی

شاشیردیجی: تعجب‌آور

اؤنجه: قبل

ایلگی: رابطه

سورون: مشکل

اَسکی: قدیمی

باشقا: دیگر

آنلاشماق: توافق کردن

باشاریلی: موفق

یاریشما: رقابت، مسابقه