هر آخشام تورکجه ورزش اوخو (366)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
سونگون فوتسالین بیرینجی‌سی
ورزش آذربایجان خبر وئریر، مس‌سونگون فوتسال سوپرلیگاسی‌نین یئددینجی هفته‌سینده ساعات ۱۷-ده عرشیا آذربایجان شهر قدس تیمی ایله یاریشمیش‌دیر. اویونو مس چتین‌لیک‌له قازانمیش‌دیر. علیرضا افضلین اویونچولاری کئچن آلتی یاریشمالارینی دا اودموش‌لار. اونلار بو گونکو یاریشمانین ایلک یاریسینی قول‌سوز بیترمیش‌لر. بهروز عظیمی اویونون سون دقیقه‌لرینده حریفین داروازاسین آچمیش‌دیر. بئله‌لیکله سونگون بو اویوندان سونرا ۲۱ امتیازلا جدولین بیرینجی‌لیینی قازانمیش‌دیر.
سپاهان شکایت‌دن قاچماق ایسته‌ییر
ریکاردو آلوز تراکتورلا اوچ ایللیک سؤزلشمه یازدیق‌دان سونرا سپاهان باشگاهینا قوشولموش‌دور. تراکتور بو ایشین قارشیسیندا آلوز هابئله سپاهان باشگاهیندان شکایت ائتمیش‌دیر. آنجاق سپاهان‌‌لی‌لار فرقلی یول‌لاردان بو شکایت‌دن قاچماق ایسته‌ییرلر. اونلار بو اویونچونون سؤزلشمه‌سینه اؤزل بیر بند آرتیراراق بو ایشین بوتون سوروملولوغون آلوزین بوینونا آتمیش‌لار. محرومیت ویاخود مالی جریمه‌لر سؤزلشمه‌نین بو بندینه گؤره سپاهانی ایلگی‌لندیرمه‌ییر. آلوزین وکیل‌لرینین ادعاسینا گؤره سپاهان باشگاهی هر بیر محرومیت ویاخود جریمه‌دن اوزاق اولاجاق‌‌دیر. آنجاق تراکتور برزیل‌لی بیر وکیلین دسته‌ییی ایله آلوزدن شکایت ائتمیش‌دیر. اونلار سپاهان باشگاهی‌نین بوینونا آغیر بیر جریمه قویماق ایسته‌ییرلر.
مهرداد محمدی مئیدانا قاییتدی!
مهرداد محمدی یای آلیش وئریش‌لرینده تراکتورا قوشولموش‌دور. او استقلال‌دان آیریلاراق دراقان اسکوچیچین تیمینه گلمیش‌دیر. آنجاق ایلک اوچ یاریشمانی مصدوم اولدوغو اوچون اَلدن وئرمیش‌دیر. بو اویونچو کئچن فصل اوزون سوره‌لی بیر مصدومیت یاشامیش‌دیر. باش‌مشقچی‌نین گؤیلونو آلماق اوچون تراکتورون حاضیرلیق یاریشمالارینا قاتیلمیش‌دیر. آنجاق دوماقوی دروژدک‌لا تومیسلاو اشترکالی اسکوچیچین ایلک سئچیم‌لری‌دیرلر. مهرداد میللی تیمه ده قوشولماق ایسته‌ییر. او اوزدن مئیدانا گیرمک اوچون تراکتورون مشقچی‌سی‌نین نظرینی آلمالی‌دیر.
فرجی اسکونون گؤیلونو آلابیلمه‌میش
فرشاد فرجی دؤرد فصل یاریم پرسپولیس‌ده چالیشدیقدان سونرا بو تیمدن آیریلاراق تراکتورا قوشولموش‌دور. او پرسپولیس‌ده شجاع خلیل‌زاده‌نین یئرینه مئیدانا گئتمیش‌دیر. عارف آقاسی ، عارف غلامی ، علیرضا آرتانین تراکتوردان آیریلدیق‌لارینا گؤره فرجی تراکتورون تمل ترکیبی‌نین دفاع‌لاریندان ساییلیردی. آنجاق او فصلین ایلک اوچ یاریشماسیندا نیمکت‌ده اوتورموش‌دور. اسکوچیچ ده‌ییشیم‌سیز ترکیب‌لرله اویون اوینادیغی اوچون فرجی‌‌نین نه زمان مئیدانا گیره‌بیله‌جه‌یی بللی دئییل‌دیر. تراکتورون باش‌مشقچی‌سی هله‌لیک شجاع‌لا سدلارین جوتلویونو دفاع خطینده اویناتماق ایسته‌ییر. فرجی ده ۳۳ نومره‌لی کؤینه‌یی ایله اسکونون نظری ده‌ییشیلن گونه قدر مئیدان‌دان اوزاق قالمالی‌دیر.
یاریشما: رقابت ، مسابقه
باش‌مشقچی: سرمربی
ده‌ییشیم‌سیز: بدون تغییر
سئچیم: انتخاب
ایلک: اولین، ابتدایی، آغازین
سؤزلشمه: قرارداد
ایلگی: به چیزی مربوط بودن
سون: آخر، پایان
قول: گل
اؤزل: خاص، ویژه
کد خبر 6158
