خبر ترکی:

پرسپولیس‌ین خرج‌لرینی کیم اؤده‌ییر؟

شهر بانکاسی‌نین پرسپولیس تیمینه سینیرسیزجا دستک اولماسی تراکتورچولارین اعتراضینا سبب اولموش‌دور. نییه کی بو بانکانین سهامی‌نین بیر چوخو تبریز شهرداری‌سی‌نین‌دیر. پرسپولیس تیمی بانکالارین کنسرسیومونا تاپشیریلمیش‌دیر. اَن چوخ سهام دا شهر بانکاسینا وئریلمیش‌دیر. بو اولای ایلک باشدان تراکتورچولارین اعتراضینا سبب اولموش‌دور. او زامان تبریزین شهر شوراسی ایله شهرداری بیرلیکده بیر بیلدیری‌ده بو حاقدا آچیقلاما بئله وئرمیش‌دیرلر:«بو بانک اؤزل و باغیمسیز بیر قوروم‌دور. تبریزن شهرداری یالنیز فرقلی فیکیرلری اونلارا چاتدیرابیلر». شهرداری‌نین سوروملولاری بو مسئله‌نین پئشینی بوراخمایاجاق‌لارینا سؤز وئرمیش‌دیرلر. آنجاق گؤزله‌نیلن سونوج‌لار اَلده ائدیلمه‌میش‌دیر.

تراکتورون یئنی قاپیچی‌سی ساواشچی‌دیر

مارکو یوهانسون اینتراخت برانشوایگ تیمی‌نین قاپیچی‌سی تراکتور باشگاهی ایله تیمه قوشولماق اوچون آنلاشمیش‌دیر. یاخین زامان‌دا سؤزلشمه یازدیق‌دان سونرا علیرضا بیرانوندین یئرینه داروازادا دوراجاق‌دیر. بو قاپیچی سوئد دوغوملوسودور. اؤلکه‌سینه اوینادیغی سون اویون‌دا بؤیوک بیر چاتیشما یاراتمیش‌دیر. یاریشما‌نین مساوی قولوندان سونرا حریف اویونچوسو یاریشمانین زامانینی کورلاماغا چالیشمیش‌دیر. یوهانسون دا بو اویونچو ایله چاتیشاراق قیچی ایله اونو وورموش‌دور. بؤیوک بیر چاتیشمادان سونرا حاکیم قیرمیز کارت‌لا یوهانسونو مئیدان‌دان چیخارمیش‌دیر.

تراکتورون اود پارچاسی یاریش مئیدانیندا

تراکتور یئنی فصلین ایلک هفته‌لرینده یاخشی سونوج‌لار الده ائتمه‌میش‌دیر. اونلار بو گونه قدر هئچ بیر یاریشمانی اودابیلمه‌میش‌لر. دراقان اسکوچیچی اندیشه‌لندیرن مسئله‌ اویونچولارین فیزیکسل حاضیرلیغی‌دیر. مصدوم ویاخود یئنی قوشولان اویونچولارین مئیدانا گیرمه‌سی اوچون یاخشی بیر زامان سئچمک باشاریلی اولماغین اؤنملی فاکتورلاریندان‌دیر. بو اویونچولار باشقا اویونچولارلا هماهنگ اولمالی‌دیرلار. مهرداد محمدی‌‌نین تراکتور اوچون مئیدانا گئتمه‌سی اونلارا چوخ یاردیمجی اولابیلر. او فصلین ایلک ایکی یاریشماسینی مصدوم اولدوغو اوچون اَلدن وئرمیش‌دیر. ایندی ایسه کئچمیشه تای پاریلداماق اوچون یئنی فورصت‌لر اَلده ائتمیش‌دیر.

سونوج: نتیجه

یئنی: جدید

ایلک: آغاز، ابتدا

یاردیمجی: کمک‌کننده

اؤلکه: کشور

یاریشما: رقابت

قاپیچی: دروازه‌بان

اؤزل: خاص، ویژه

باغیمسیز: مستقل

سوروملو: مسئول

قوروم: سازمان

اؤده‌مک: پرداخت کردن