هر آخشام تورکجه ورزش اوخو (375)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
دانیال اسماعیلی‌فرین قیزیل پاسی
دانیال اسماعیلی‌فر لیگین باشلانغیجیندا نه قدر حاضیرلیقلی اولدوغونو هامییا گؤسترمیش‌دیر. او فیزیکسل هابئله روحسل باخیمدان گوجلودور. کئچن هفته مس‌رفسنجانین دا قارشیسیندا یاخشی اویون اوینامیش‌دیر. بو گون آلومینیوم قارشیسیندا اونون گؤزل اویونون سونوجوندا تیراختور ایلک قولونو وورموش‌دور. او یاریشمانین ایلک دقیقه‌لریندن اوجا پاس‌لارینی دروژدوکا گؤندرمیش‌دیر. دانیالین پاسی آلومینیومون دفاع اویونچوسونو سورپرایز ائتمیش‌دیر. دروژدوک دا هئچ بیر چتین‌لیک یاشامادان توپو حریفین داروازاسیندا یئرلشدیرمیش‌دیر. بئله‌لیکله تیراختورون ایلک قولو دانیالین قیزیل پاسی ایله اَلده ائدیلمیش‌دیر.
شهرداری اورمییه هله اعتصاب‌دادیر
شهرداری اورمییه والیبال تیمی‌نین اویونچولارینین اعتصابینا گؤره تیمین مشق‌لری بئش گونلوک تعطیل اولموش‌دور. آنجاق آیدین رحمانی، اورمییه‌نین بلدیه باشقانی اونلارین اعتصابینا هئچ بیر تپکی گؤسترمه‌میش. اویونچولار ایکی آی اؤنجه‌دن مشق ائتمه‌یه باشلامیش‌دیرلار. بونا رغمن هئچ بیر پول آلمامیش‌لار. اونلارین سؤزلشمه‌سی ده رسمی اولاراق لیگ قوروموندا ثبت اولونمامیش‌دیر. رحمانی وئردییی سؤزلری توتمادیقدان سونرا اویونچولار اعتصاب ائتمیش‌لر. بلدیه باشقانی لیگدن اؤنجه هوادارلارا قهرمانلیق سؤزو وئرمیش‌ایدی. آنجاق تیمین ایندیکی دورومو رسانه‌لر هابئله هوادارلاری شاشیرتمیش‌دیر.
بیرو تیراختورچو قیزلاردان یاردیم ایسته‌دی
تیراختورلا آلومینیوم اراک تیم‌لری بو گون تبریزین بنیان‌دیزل استادیوموندا گؤروشموش‌لر. اویونو دؤرد-بیره تراکتور اودموش‌دور. انضباطی کمیته‌نین حؤکمونه گؤره بو گون تیراختورچو کیشی‌لر استادیوما گئتمک‌دن محروم اولموش‌لار. بو یاریشما تکجه قادین‌لارلا کئچیریلمیش‌دیر. علیرضا بیرانوند تیراختورون قاپیچی‌سی اینستاگرام پایلاشیمیندا قادین‌لاری استادیوما گئتمک اوچون آلقیشلامیش‌دیر. او تیراختورچو قیزلارین شکلینی پایلاشاراق بئله یازمیش‌دیر:« تیراختورو سئون‌لر کیشی ویاخود قادین اولدوق‌لارینا باخمایاراق هر یئردن تیمه دستک اولورلار. آنجاق بو گون تبریزلی قیزلارین گونودور. اونلار تیم‌لرینه دستک اولماق اوچون استادیوما گئده‌جک‌لر. سیزین محبتینیزله فصلین ایلک اوغورونو قازاناجاغیق.»
یاریشما:رقابت ، مسابقه
قول: گل
قارشیسیندا: روبرویش
ایلک: اولین
سونوج: نتیجه
باشلانغیج: آغاز
آلقیش: تشویق
قادین: زن
قاپیچی: دروازه‌بان
دستک: کمک، حمایت
قوروم: سازمان
کد خبر 6245
