هر آخشام تورکجه ورزش اوخو (381)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
شهرداری اورمییه‌نین پولسوزلوغو
شهرداری اورمییه اویونچولاری‌نین سؤزلشمهسینی فدراسیون‌دا ثبت ائتمه‌یی باجارمیش‌دیر. آنجاق اونلارین مالی سورون‌لاری هله یئرینده‌دیر. اویونچولار بو گونه قدر هئچ بیر پول آلابیلمه‌میش‌لر. اونلارین بیر هفته‌‌لیک اعتصابی دا سوروملولار طرفیندن جاوابسیز بوراخیلمیش‌دیر. او اوزدن شهرداری‌نین اوردوسوندا اومیدسیزلیک یارانمیش‌دیر. اویونچولارین بیر سیراسی باشگاهدان پول آلابیلمه‌دیک‌لری اوچون باشقا تیم‌لرین اؤنری‌لرینی آراشدیرماق‌دیرلار. اونلارین شهرداری‌دن آیریلماق احتمالی دا واردیر.
شجاع آسیانین سئچیلمیش تیمینده
آسیا داهی‌لر لیگاسی‌نین ایلک هفته‌سی باشا چاتمیش‌دیر. تیراختور شباب الاهلی‌دن بیر امتیاز آلمیش‌دیر. تیمین اَن یاخشی اویونچوسو بو یاریشمادا شجاع خلیل‌زاده‌ایدی. آسیا لیگاسی‌نین ایلک هفته‌سی‌نین سئچیلمیش تیمینده ایرانلی اویونچولارین آراسیندا تکجه شجاع‌نین آدی بو لیسته‌د‌ه گؤرونمک‌ده‌دیر. او تومیسلاو اشترکالی‌یه قول پاسی وئرمیش‌دیر. بوندان علاوه یاریشمانین ایکینجی یاریسیندا علیرضا بیرانوند توپو داروزادان اوزاقلاشدیرا بیلمه‌دییی زامان او توپو ائشییه گؤندرمیش‌دیر. آسیانین سئچیلمیش تیمینده تئو هرناندز، هیروکی ساکای، گیلهرمه، ریاض محرز، خوسلپ کیمی تانینمیش اویونچولارین آدی واردیر.
آلوزین کارتی نه‌دن ایندی گلدی؟!
اؤلکه‌نین فوتبال لیگاسی‌نین قورومو یایینلایاراق تیراختورلا ریکاردو آلوزین آراسیندا اولان چاتیشمایا سون قویماق ایسته‌میش. اونلارین بیلدیری‌سینه گؤره آلوز دوز شکیلده سؤزلشمهسینی تیراختورلا پوزوب سونرا سپاهانا قوشولموش‌دور. لیگ قورومونون ادعاسینا گؤره آلوز فصل‌دن اؤنجه تیراختوردان آیریلاراق اصفهانا گئتمیش‌دیر. هابئله بو بیلدیری‌ده ریکاردو آلوزین اویون کارتی‌نین سپاهان آدینا وئردیلدییی اعلان ائدیلمیش‌دیر. بئله‌لیکه بو اویونچو سپاهان اوچون مئیدانا گئده‌جک‌دیر. آنجاق اونون پرونده‌سی فیفادا هله آچیق‌دیر.
آقاسی‌نین یوخلوغو سئویندیریجی‌دیر!
اؤلکه سوپرلیگاسی‌نین باهالی اویونچولاریندان بیری عارف آقاسی‌دیر. او کئچن فصل تیراختورون دفاع خطینده یاخشی سونوج‌لار قازانمیش‌دیر. او فرقلی تیم‌لرله دانیشیق آپاردیقدان سونرا سونون‌دا یوخاری قیمت‌له استقلال تیمینه قوشولموش‌دور. آنجاق سون یاریشمالاردا اونون اویون سویه‌سی اوتاندیریجی بیر دوروما گلمیش‌دیر. محمدرضا احمدی استقلال مودورلرینی بو حاقدا قینامیش‌دیر. او آقاسی‌یه گؤره بئله دئمیش‌دیر:« عارف آقاسی پیس اویون اوینادیغی اوچون تیراختورون هوادارلاری سئوینیرلر. او کافا یاریشمالاریندا دا یاخشی سونوج‌لار اَلده ائده‌بیلمه‌میش‌دیر.»
اؤلکه: کشور
سئویندیرجی: خوشحال
یاریشما: رقابت
سونوج: نتیجه
قوروم: سازمان
اؤنجه: قبل
داهی‌لر لیگاسی: لیگ نخبگان
قول: گل
دوروم: موقعیت، وضعیت
سویه: سطح
کد خبر 6292
