سپاهان-تیراختور اویون یوخ ساواش

سوپرلیگانین دؤردونجو هفته‌سینده اؤزل بیر یاریشما کئچیریله‌جک. سپاهان‌لا تیراختور تیم‌لری آرالاریندا اولان چاتیشمالارین آجیسی ایله مئیدانا گئده‌جک‌لر. بو یاریشما عادی بیر اویون دئییل‌دیر. صاباحکی اویون بؤیوک بیر ساواش‌دیر. سون ایل‌لرده بو ایکی باشگاهین ایلیشکی‌لری یولداشجاایدی. اونلار باجیلیق سؤزلشمه‌سینه ده امضا آتمیش‌لار. آنجاق بو یولداشلیق چوخ تئز آرادان قالدیریلمیش‌دیر. ریکاردو آلوز تیراختورلا سؤزلشمه‌سی اولارکن سپاهانا قوشولموش‌دور. بو مسئله آلیش وئریش گون‌لرینده بؤیوک های سالمیش‌دیر. آلوزین کارتی فصلین ایلک گون‌لرینده تیراختورون آدینا وئریلمیش‌‌دیر. آنجاق سپاهانین مودورلری سونوندا اونون اویون کارتی‌نی آلمیش‌لار.

سپاهانین آلتی اویونچوسو صاباح یوخدور

سوپرلیگانین دؤردونجو هفته‌سینده یکشنبه گونو سپاهان‌لا تیراختور تیم‌لری اصفهانین نقش جهان استادیومون‌دا یاریشاجاق‌لار. سپاهانین آلتی اویونچوسو محروم ویاخود مصدوم اولدوق‌لاری اوچون بو اویونا قاتیلابیلمه‌یه‌جک‌لر. امید نورافکن محروم اولموش‌دور. محرم نویدکیا، سپاهانین باش‌مشقچی‌سی ، هادی محمدی ، ایوان سانچز، میلاد زکی‌پور هابئله سیدحسین حسینی فیزیکسل سورون‌لاردان دولایی یاریشمادا اولمایاجاق‌لار. حسینی‌نین دورومو کئچن گون‌لره گؤره یاخشی اولسا دا یوخاری احتمال ایله محمدرضا اخباری اونون یئرینه داروزادا دوراجاق‌دیر. محمد کریمی، سپاهانین کاپیتانی دیز ناحیه‌سیندن یارالی اولدوغو اوچون گلن نئچه آی‌دا مئیدان‌لاردان اوزاق اولاجاق‌دیر.

پوستونسکی-آلوز دئولرین دوئلی

ایقور پوستونسکی ایله ریکاردو آلوز کئچن فصل تیراختورون اورتا خطینده بیرلیکده اویناییردیرلار. آنجاق صاباح آلوز سپاهانین اویونچوسو اولاراق تیراختورلا قارشیلاشاجاق‌‌دیر. آلوز ایله ایقور بو یاریشمادا قارشی قارشیا گله‌جک‌لر. پوستونسکی آلوزی دایاندیرماق اوچون اؤزل پلان‌لا قاباغا گئتملی‌دیر. او ریکاردونون بوتون حرکت‌لرینی باشاریر. او اوزدن اویون سوره‌جینده اونو فشاردا قویابیلر. قارشی طرف‌ده ریکاردو آلوز ایلک دفعه اولاراق سپاهان اوچون مئیدانا گئده‌جک‌دیر. او صاباح بوتون گوجو ایله باجاریق‌لارینی گؤسترمک اوچون چالیشاجاق‌دیر. ایقور پوستونسکی ایله ریکاردو آلوزین دوئلی سوپرلیگانین چکیجی دوئل‌لریندن اولاجاق‌‌دیر. نییه کی هر ایکیسی یوخاری کیفیتلی بیر اویونچودورلار.

دئو: دیو

قارشی: روبرو

باجاریق: توانایی

اویونچو: بازیکن

یاریشما: رقابت، مسابقه

سوره‌ج: فرآیند

دوروم: موقعیت

باش‌مشقچی‌: سرمربی

سورون: مشکل

سؤزلشمه: قرارداد

ایلیشکی: ارتباط

اؤزل: ویژه، خاص

سون: آخر،پایان