تیراختور-الوحده بیرینجی‌لر اویونو

تیراختورلا الوحده تیم‌لری دوشنبه گونو تبریزده یاریشاجاق‌لار. آسیا داهی‌لر لیگاسیندا بو یاریشما تیراختورلا الوحده‌‌نین ایلک قارشیلاشماسی اولاجاق‌‌دیر. تبریزین یادگار استادیومو تعمیردن سونرا ایلک دفعه بو یاریشمایا میزبانلیق ائده‌جک. الوحده تیمی ده ایلک دفعه اولاراق ایرانلی بیر تیم‌له قارشیلاشاجاق‌دیر. محمد قربانی الوحده‌نین ایرانلی هافبکی بو یاریشمادا ایلک دفعه اولاراق رسمی شکیلده ایرانلی تیمین قارشیسینا چیخاجاق‌دیر.

قربانی؛ اسکوچیچ اویونون فیلمینه باخسین!

تیراختورلا فجرسپاسی تیم‌لری سوپرلیگانین بئشینجی هفته‌سینده گؤروشموش‌لر. اونلارین اویونو هئچ-هئچه باشاچاتمیش‌دیر. تیراختور باشگاهی بو یاریشمادان سونرا فجر تیمی‌نین وقت ایتیرمه‌یه چالیشدیغی‌نی ادعا ائتمیش‌دیر. فجرین باش مشقچی‌سی بو حاقدا بئله دئمیش‌دیر:« اویون تاکتیکه باغلی بیر یاریشماایدی. اویونچولار بوتون گوج‌لری‌له چالیشدیلار. اونلارین قازاندیق‌لاری سونوج‌لار شانسا باغلی دئییل‌‌دی. اونلاردان تشککور ائدیرم. تبریزده یاخشی جو وارایدی. آنجاق تیراختورون مودورلری فنی قونولارا داها چوخ دیققت وئرملی‌دیرلر. اسکوچیچ اینستادا فجره گؤره پایلاشیم ائتمک یئرینه بیر داها اویونون فیلمینه باخمالی‌دیر.»

خداداد عزیزی‌له اوغلو یادگار استادیوموندا

بو گون خداداد عزیزی تیراختور باشگاهی‌نین مودورلری‌له بیرلیکده یادگار استادیومونا گئتمیش‌لر. خدادادین اوغلو دا بو گون آتاسی‌نین یانینداایدی. اونلار استادیومون چمن دورومونو آنالیز ائتمک اوچون یادگار استادیومونا باش چکمیش‌لر. تیراختورون استادیومونون چمن دورومو ایل‌لر بویو بؤیوک سورون اولموش‌دور. بوندان اؤنجه پاکو خمس‌ یادگارین تعمیر اولونماسینی ایسته‌میش‌دیر. اوندان سونرا هوادارلار دا چمنین ده‌ییشمه‌سینی ایسته‌میش‌لر. چمن بوندان اؤنجه ده ده‌ییشیلمیش‌دیر. آنجاق کیفیتینی اَلدن وئرمیش‌دیر. سونوندا بو فصل تورکییه‌لی بیر شیرکت بو ایشی بوینونا آلمیش‌دیر.

یاریشما: رقابت

اؤنجه: قبل

سون: آخر، پایان

سورون: مشکل

دوروم: موقعیت

سونوج: نتیجه

قونو: موضوع

اویون: بازی

اویونچو: بازیکن

قارشیسیندا: روبرویش

ایلک: اولین

باش‌مشقچی: سرمربی