هر آخشام تورکجه ورزش اوخو (392)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
آذربایجانین بؤیوک دربی‌سی
بیرینجی سویه فوتبال لیگاسی‌نین آلتینجی هفته‌سینده مس‌سونگون‌له اورمییه‌نین دوخسان تیمی باکری استادیوموندا یاریشاجاق‌لار. دوخسان « ۴۰۰ گون سوپرلیگایا قدر» شوعاری ایله یاریشمالارا باشلامیش‌دیر. اونلار نیمکت‌لرینده باش وئرن ده‌ییشیک‌لیک‌لردن دولایی بو یاریشمانی اودمالی‌دیرلار. مس سونگون باشگاهی‌نین حاشیه‌لری تیمه ده ائتکی بوراخمیش‌دیر. اونلار دا ایلک قازانج‌لاری اَلده ائتمک اوچون چالیشاجاق‌لار. دوخسان تیمی آلتی امتیازلا اونونجودور. سونگون ده بیر امتیازلا اون‌سککیزینجی‌دیر. بو یاریشما قیزیل ایله مس‌ین دربی‌سی آدلانمیش‌دیر.
انتقام فورصتی بیرونون اَلیندن چیخدی
عمر خریبین الوحده‌نین سوریه‌لی اویونچوسو بو فصل بئش قول وورموش‌دور. آنجاق او الوحده‌نین کاروانی ایله تبریزه گلمه‌میش‌دیر. ۲۰۱۷ قهرمان‌لار لیگاسیندا خریبین اوچ دفعه بیرونون داروازاسین آچمیش‌دیر. او زامان آسیا یاریشمالارینین سونوندا عمر آسیانین اَن یاخشی اویونچوسو سئچیلمیش‌دیر. دئمک خریبین بیرانونده ووردوغو او اوچ قولون سونوجوندا بو اؤدولو آلمیش‌دیر. آنجاق تبریزه گلمه‌دییی اوچون انتقام فورصتی بیرونون اَلیندن چیخمیش‌‌دیر.
تیراختور ۱۴۵ گون سونرا یادگار استادیوموندا
تیراختورون قهرمانلیغیندان سونرا یادگار استادیومونون تعمیر اولوناجاغی بیلدیرمیش‌دیر. او اوزدن تیراختور یاریشمالارینین بیر نئچه‌سینی بنیان‌دیزل‌ده کئچیرمک مجبوریتینده قالمیش‌دیر. سونوندا بو گون الوحده تیراختور یاریشماسی یادگاردا کئچیریلمیش‌دیر. هوادارلار یئنی فصل‌ده ایلک دفعه اولاراق یادگار استادیومونا گئتمیش‌لر. سون دفعه اردیبهشت‌ده تیراختور یادگاردا اویون اوینامیش‌دیر. ایندی ایسه دراقان اسکوچیچ‌‌ین اویونچولاری ۱۴۵ گون سونرا یادگار استادیومونا قاییتمیش‌لار.
یاریشما: رقابت ، مسابقه
سون: آخر، پایان
ایلک: اول
یئنی: جدید
قول: گل
سونوج: نتیجه
اؤدول: جایزه
سویه: سطح
قازانج: دست‌آورد
کد خبر 6373
