هر آخشام تورکجه ورزش اوخو (393)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
اسکوچیچ احسان حاج‌صفی‌له باریشدی!
دراقان اسکوچیچ ایرانین میللی تیمینده چالیشمیش‌دیر. کئچن هفته سپاهان-تیراختور یاریشماسیندا احسان حاج‌صفی‌له اسکوچیچ قوجاقلاشمیش‌لار. اسکوچیچ‌ین میللی تیمدن چیخاریلماسیندا احسان حاج‌صفی کارلوس کی‌روشون طرفین توتموش‌‌دور. او کروات مشقچی‌سی‌نین میللی تیمدن قوولماسینی ایسته‌ییردی. آنجاق اسکوچیچ میللی تیمده مشقچی اولان زامان حاج‌صفی تیمین کاپیتانی‌ایدی. اسکو ایله احسانین آراسی یاخشی‌ایدی آنجاق اونلارا گؤره بیر سیرا شایعه‌لر یایینلانمیش‌دیر. او زامان یایینلانان شایعه‌لره گؤره اسکوچیچ حاج‌صفی‌نی ۲۰۲۲ دونیا کاپینا آپارماق ایسته‌مه‌ییردی.
بیرو؛ تیراختور سیزی سئویندیره‌جک
دونن گئجه تیراختور امارات‌ین الوحده تیمی‌نین قارشیسیندا هئچ-هئچه مساوی ائتمیش‌‌دیر. علیرضا بیرانوند تیمین داروازاسین یاخشیجا قوروموش‌دور. تیراختورون میللی اویونچوسو یاریشمادان سونرا اینستاقرام صفحه‌سینده قازاندیق‌لاری سونوج‌لاردان دولایی تأسسوفونو بیلدیرمیش‌دیر. اونون سؤزلری بئله‌دیر:« کئچن فصل آسیا یاریشمالارینین یوخاری سویه‌سینه چاتماق اوچون چوخ چالیشدیق. بو گون میزبانلیق ائتدییمیز ایلک اویونو اودماق ایسته‌ییردیک آنجاق سیزین محبت‌لرینیزه یاخشیجا قارشیلیق وئره‌بیلمه‌دیک. سیزین بالاجا قارداشینیز اولاراق بو تیمین یئنه سیزی سئویندیره‌‌بیله‌جه‌یینه سؤز وئریرم.»
الوحده چوخ شانسلی‌ایدی
امارات‌ین الیوم قزئته‌سی دوننکی یاریشما حاقدا بئله یازمیش‌دیر:« الوحده تیراختورون قارشیسیندا هئچ-هئچه مساوی ائتدی. بو سونوج‌لا الوحده دؤرد امتیازلی اولموش‌دور. تیراختور دا ایکینجی امتیازینی قازانمیش‌دیر. اویونون سون دقیقه‌لرینده تومیسلاو اشترکالی‌نین شوتو الوحده‌نین داروازاسین آچابیلردی آنجاق توپ چؤله گئتمیش‌دیر. بئله‌لیکله الوحده بیر امتیازلا ایران‌دان اماراتا قاییتمیش‌دیر. اونلار بو بیر امتیازی قازاندیق‌لاری اوچون چوخ شانسلی‌ایدیلار.»
یاریشما: رقابت، مسابقه
مشقچی: مربی
اویون: بازی
اویونچو: بازیکن
قارشیسیندا: روبرویش
سَویه: سطح
سونوج: نتیجه
قزئت: روزنامه
سون: آخر، پایان
کد خبر 6379
