هر آخشام تورکجه ورزش اوخو (394)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
ترابی نه زامان قاییداجاق؟!
مهدی ترابی تیراختور-آلومینیوم یاریشماسیندا یارالاندیقدان سونرا اویون مئیدانیندان آیریلمیش‌دیر. کئچن هفته‌لره گؤره دورومو یاخشی اولسا دا آنجاق مئیدانا گیره‌بیله‌جک بیر دوروما چاتمامیش‌دیر. دئییلن‌لره گؤره ترابی فیفادی گون‌لریندن سونرا یاریش مئیدانینا قاییداجاق‌دیر. دئمک مهر آیی‌نین ۲۴-جو گونو ملوان-تیراختور یاریشماسیندا اویون اوینایاجاق‌دیر. دراقان اسکوچیچ فرقلی اویونچولارلا ترابی‌نین یئرینی دولدورماق اوچون چالیشمیش‌دیر. آنجاق اویونچولارین هئچ بیریسی یئترینجه اونون تاکتیک‌لرینی اویون مئیدانیندا ایشله‌ده بیلمه‌میش‌لر. یوخاری احتمال ایله ملوانین قارشیسیندا اوینایاجاق‌دیر.
آذربایجان دربیسی؛ سونگون-شهرداری
شهرداری اورمییه ایله تبریزین مس‌سونگون والیبال تیم‌لری فصل‌دن اؤنجه‌کی حاضیرلیق یاریشمالاریندا هفته‌نین بیرینجی و ایکینجی گون‌لری تبریزین اقدمی سالونوندا گؤروشه‌جک‌لر. بو یاریشما عبدالرضا علیزاده ایله مس‌سونگونون باش‌مشقچی‌سی‌نین ایسته‌یی ایله کئچیریله‌جک. شهرداری اورمییه سوپرلیگایا حاضیرلانماق‌دادیر. مس‌سونگون ده بیرینجی سویه والیبال لیگاسی‌نی گوجلو باشلاماق ایسته‌ییر. بو ایکی تیمین اویونو «آذربایجان دربیسی» اولاراق ایکی تیمین حاضیرلیق سوره‌جینده اونلارا چوخ یاردیمجی اولابیلر.
محمد نادری یانلیش‌سیز اویونچو
محمد نادری، تیراختورون سول دفاع‌سی، فوتبال ساحه‌سینده آددیم آددیم یئتکینلییه چاتمیش‌دیر. ایندی ایسه دفاع‌دان علاوه توپو سورعت‌له حمله خطینه چاتدیرماق قونوسوندا چوخ باشاریلی‌دیر. او فیزیکسل باخیمدان دا چوخ گوجلودور. اوجا بوی‌لو اولدوغو اوچون بؤیوک آددیم‌لار آتماق‌دا باشاریلی‌دیر. او فیزیکسل باجاریق‌لاری‌لا حریفین مهاجم‌لرینی فشارا قویموش‌دور. او توپا بیر بالاجا ضربه وورماق‌لا اویونو حریفین مئیدانینا طرف یؤنلندیره‌بیلیر. تیراختورون کئچن یاریشماسیندا نادری‌نین یانلیش حرکت‌لرینین سایی چوخ آشاغی‌ایدی. اسکوچیچ نادری ایله دانیال اسماعیلی‌فری دفاع خطینده قوللاناراق تاکتیک باخیمیدان اَلی آچیق‌دیر.
یانلیش: اشتباه
اویونچو: بازیکن
قوللانماق: استفاده کردن، به کاربردن
یاریشما: رقابت، مسابقه
یؤنلندیرمک: جهت‌دادن
باشاریلی: موفق
باش‌مشقچی: سرمربی
یئترینجه: به حد کافی
دوروم: موقعیت
اویون: بازی
کد خبر 6386
