هر آخشام تورکجه ورزش اوخو (397)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
سونگونون فوتبال تیمی هاوادا
مس‌سونگون باشگاهی‌نین فوتبال تیمی باشقا تیم‌لرینه یاخشی دوروم‌دا دئییل. اونلار فرقلی سورون‌لارلا اوز-اوزه‌دیرلر. اونلارین میزبانلیق ویاخود مشق ائتمک اوچون هئچ بیر یئرلری یوخدور. یوخاری احتمال ایله یئنه ده اورمییه‌نین دوخسان تیمی اؤز استادیومونو اونلارا وئره‌جک‌دیر. تیمین اویونچولاری مالی باخیمدان چوخ گوجسوزدورلر. فنی باخیمدان دا داها پیس دوروم‌دادیرلار. فصلین ایلک بئش یاریشماسی‌نین هئچ بیریسینده باشاریلی اولمامیش‌لار. اونلار تکجه بیر یاریشمانی مساوی ائتمیش‌لر. باشگاهین سوروملو‌لاری دا بو تیم‌له ماراقلانمیرلار.
شجاع بئش‌یوزلوک رکوردون قیراجاق
شجاع خلیل‌زاده ایلک دفعه سوپرلیگانین اونونجو دؤورونده کرمانین مس تیمینده اویون اوینامیش‌دیر. سونرا دا سپاهانا گئدیب اونلارلا قهرمان اولموش‌دور. او سربازلیق دؤورونو تیراختوردا کئچیرمک مجبوریتینده قالمیش‌دیر. پرسپولیس، الاهلی، الریان بو اویونچونون سونراکی تیم‌لری اولموش‌لار. سونوندا سوپرلیگانین ایییرمی اوچونجو دؤورونده تیراختورا قاییتمیش‌دیر. حذفی کاپ‌لا میللی اویون‌لارینی دا حسابلایاراق او ۴۹۵ یاریشمادا ایران فوتبالی‌نین بیرینجی سویه‌سینده چالیشمیش‌دیر.
دانیال اسماعیلی‌فر AFCنین صفحه‌سینده
تیراختور آسیا داهی‌لر لیگاسی‌نین ایلک یاریشماسیندا اون نفرله مساوی ائتمیش‌دیر. ایکینجی یاریشمادا الوحده‌نین قارشیسیندا اویونو هئچ-هئچه بیتیرمیش‌دیر. دانیال اسماعیلی‌فرین اویونو مئیدانین ساغ طرفینده هاریکاایدی. اونون باجاریق‌لاری ای‌اف‌سی‌نین دیققتینی چکمیش‌دیر. اسماعیلی‌فر تیراختورون سون آسیا یاریشماسیندا آمار باخیمدان داها یاخشی‌ایدی. او هفته‌نین اَن یاخشی اویونچولارینین آراسیندا اؤزو اوچون یئر آچمیش‌دیر. ای‌اف‌سی‌نین رسمی صفحه‌سی‌نین یایینلادیغی خبرده باتی ایله دوغونون اَن یاخشی اویونچولارینین آراسیندا دانیالین دا آدی گؤرونمک‌ده‌دیر.
اسکو ترکیب‌ده ده‌ییشیک‌لیک یاراتدی
تیراختورلا فولاد تیم‌لری بو گئجه(شنبه) اهوازدا یاریشمیش‌لار. دراقان اسکوچیچ تیمین ترکیبینده ده‌ییشیک‌لیک یاراتمیش‌دیر. الوحده‌نین قارشیسیندا تومیسلاو اشترکالی، دوماقوی دروژدوکون یئرینه تیراختورون حمله خطینده اویناییردی. آنجاق او یاریشمادا باشاریلی اولمادیغی اوچون بو گون ایلک یاری‌دا اسکوچیچ اونو نیمکت‌ده اوتورتموش‌دور. بوندان علاوه تیراختورون اورتا خطینده اوچ هافبک‌له اوینامیش‌دیر. مهدی هاشمی‌نژادلا امیرحسین حسین‌زاده ده وینگر اولاراق چالیشمیش‌لار. دوماقوی دا حمله خطینی اَله آلمیش‌دیر.
باشقا: دیگر
سورون: مشکل
ایلک: اولین
سوروملو: مسئول
داهی‌لر لیگاسی: لیگ نخبگان
یاریشما: رقابت، مسابقه
دوروم: موقعیت
باشاریلی: موفق
سویه: سطح
سون: آخر، پایان
باتی: غرب
دوغو: شرق
کد خبر 6408
