هر آخشام تورکجه ورزش اوخو (402)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
تیراختورون اَن یاخشی اویونچولاری
سوپرلیگانین آلتینجی هفته‌سینه‌دک فنی بیلگی‌لری آراشدیراراق تیراختورون اویونچولارینین دورومونو بللی ائتمیشیک. مهدی هاشمی‌نژاد یئنی فصل‌ده یئترینجه یاخشی سونوج‌لار اَلده ائتمه‌سه ده تیراختورون اَن یاخشی اویونچوسو‌دور. او ۷.۲۹ نومره ایله تیمین باشقا اویونچولاریندان اوستون‌دور. دوماقوی دروژدوک دا آلومینیومون قارشیسیندا اوچ قول ووردوغو اوچون فنی باخیمدان ایکینجی‌دیر. تیراختورون اردبیللی اولدوزو، امیرحسین حسین‌زاده ۷.۲۸ نومره ایله اوچونجودور. دانیال اسماعیلی‌فر تیراختورون ترکیبینده پارلایاراق میللی تیمه چاغیریلمیش‌دیر. دانیال ۷.۲۲ امتیازلا دؤردونجو سیرادادیر. محمد نادری ایله رگی لوشکیا بئشینجی و آلتینجی‌دیرلار.
شجاع میللی تیمه قاییتدی!
میللی تیمین اوردوسو سپتامبر آییندا شجاع خلیل‌زاده اولمادان کئچیریلمیش‌دیر. شجاع میللی تیمده قلعه‌نویی ایله دراقان اسکوچیچ‌‌ین اؤنملی مهره‌لریندن‌ایدی. آنجاق بیردن بیره باشقا اویونچولار اونون یئرینی توتموش‌دورلار. میللی تیمین باشقا اویونچولاری اونون یئرینی دولدورا بیلمه‌میش‌لر. او اوزدن شجاع اؤز یئرینه قاییتمیش‌دیر. عارف آقاسی میللی تیمه چاغیریلمامیش‌‌دیر. حسین کنعانی ده مصدوم اولموش‌دور. بئله‌لیکله شجاع ایران-روسیه یاریشماسیندا تیمین تمل ترکیبینده مئیدانا گئده‌جک‌دیر.
خامروبکوف مصدوم اولدو!
اودیل خامروبکوف، تیراختورون اوزبک هافبکی اوزبکیستان میللی تیمی‌نین اویونچوسو بو اؤلکه‌نین میللی تیمی‌نین مشق‌لرینده یارالانمیش‌دیر. بو اویونچو اوزبکیستان میللی تیمی‌نین سون مشقینده قیچ ناحیه‌سیندن مصدوم اولموش‌دور. او اوزدن کویت-اوزبکیستان یاریشماسیندا تیمین ترکیبینده اولمایاجاق‌دیر. سوپرلیگ یاریشمالارینین باشلانغیجینا یاخین‌لاشارکن اونون مئیدانا قاییتماق مسئله‌سی حاقدا نیگرانچیلیق‌لار یارانمیش‌دیر. تیراختور باشگاهی بو حاقدا اوزبکیستان میللی تیمیندن آیرینتیلی بیلگی‌لر ایسته‌میش‌دیر.
تیراختور یئددینجی هفته اویون اوینامایاجاق
ایران فوتبال قورومونون بیلیدیریسینه گؤره تیراختور باشگاهی‌نین ایسته‌یی ایله تیراختور-ملوان یاریشماسی باشقا بیر زامان‌دا کئچیریله‌جک. تیراختورون بئش اویونچوسو میللی تیمین ترکیبینده چالیشماق‌دادیرلار. اونلار فیفادی اویون‌لاری اوچون حاضیرلیق آپارماق‌دادیرلار. بئله‌لیکله تیراختورون یئددینجی هفته‌سی‌نین اویونو بو هفته کئچیریلمه‌یه‌جک. مهر آیی‌نین ۲۸-جی گونو تیراختور اماراتین شارجه تیمی ایلع یاریشاجاق‌‌دیر. تیراختور-ملوان یاریشماسی دا مهرین ۲۴-جو گونو کئچیریله‌جک‌ایدی. آنجاق باشقا زامانا ائرته‌لنمیش‌دیر. اویونون زامانی سونرا بیلدیریله‌جک‌دیر.
یاریشما: رقابت، مسابقه
باشقا: دیگر
بیلگی: اطلاعات
اؤلکه: کشور
باشلانغیج: آغاز ، شروع
مشق: تمرین
اؤنملی: مهم
تمل: اصلی
قول: گل
سونوج: نتیجه
یئنی: جدید
یئترینجه: به حدکافی
قارشیسیندا: روبرویش
آراشدیرماق: بررسی کردن
قوروم: سازمان
اویونچو: بازیکن
کد خبر 6444
