هر آخشام تورکجه ورزش اوخو (403)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
کرمان‌لا آذربایجان تیم‌لرینین فرق‌لری
کرمانین «مس شهر بابک» آدلی فوتبال تیمی اؤزل بیر استادیوم تیکمیش‌دیر. بو مسئله مس‌سونگونون ائوسیزلیینی خاطیرلادیر. بوندان سونرا مس شهر بابک اویون‌لارینی اؤز استادیوموندا کئچیره‌جک‌دیر. آنجاق آذربایجانین نوماینده‌سی مس‌سونگون تیمی میزبانلیق ائتمک اوچون دوزگون بیر چمن آختارماق‌دادیر. سونگونون ورزقان استادیومو استانداردلاردان چوخ اوزاق‌دیر. اورانین ایش‌لری هله ده یاریمچیق‌دیر. کرمانلی تیم‌لرین ایمکان‌لاری هابئله استادیوم‌لاری گوندن گونه یاخشیلاشماق‌دادیر. مس سونگون ده مشق ائتمک اوچون ویاخود یاریشمالارینی کئچیرمک اوچون چمنی یوخدور.
آذربایجان اوغلو گوموش آلدی!
دونیا سویه‌سینده آغیرلیق قالدیرما یاریشمالاریندا علی عالی‌پور، باتی آذربایجانین شوط شهریندن ۱۷۶ کیلولوق آغیرلیق قالدیرماق‌لا گوموش قازانمیش‌دیر. عالی‌پور بیرینجی حرکتینده پیس شانس‌دان دولایی ۱۷۱ کیلولوق آغیرلیغی قالدیرابیلمه‌میش‌دیر. آنجاق ایکینجی و اوچونجو چالیشماسیندا ۱۷۲ کیلو هابئله ۱۷۶ کیلولوق آغیرلیغی بیر حرکت ایله قالدیریلمیش‌دیر. آنجاق ایکی ضرب‌لی بؤلوم‌‌ده ۲۱۷ کیلولوق آغیرلیغی قالدیرابیلمه‌میش‌دیر. او اوزدن قیزیل مدال اَلیندن چیخمیش‌‌دیر.
بیرو تیراختورلا آسیا قهرمانلیغی‌نی ایسته‌ییر
علیرضا بیرانوندین ایلک اویونوندان اون ایل کئچمیش‌دیر. او بو نئچه ایلین ایچینده میللی تیمین بیرینجی قاپیچی‌سی اولموش‌دور. بیرو ۲۰۱۸ و ۲۰۲۲-جی دونیا فوتبال یاریشمالارینا قاتیلمیش‌دیر. او اوزدن ایران میللی تیمی‌نین قاپیچی‌لاری آراسیندا رکورد قیرمیش‌دیر. بو قاپیچی سوپرلیگ‌ده آلتی قهرمانلیق قازانمیش‌دیر. ایکی دفعه حذفی کاپی اودموش‌دور. دؤرد دفعه ده سوپرجامی قازانمیش‌دیر. بوتون بونلارا رغمن اونون اوره‌یینده بیر سیرا حسرت‌لر واردیر. بیرو سون دانیشیغیندا بئله دئمیش‌‌دیر:« باشگاه سویه‌سینده چوخ قهرمانلیق‌لار قازانمیشام. آنجاق آسیا سویه‌سینده ده قهرمان اولماق ایسته‌ییرم. تیراختورلا بیرلیکده قهرمان اولماغی اومید ائدیرم.»
سویه: سطح
قاپیچی: دروازه‌بان
ایلک: اولین
یاریشما: رقابت
آغیرلیق قالدیرماق: وزنه‌برداری
بؤلوم: قسمت
یاریمچیق: نصفه نیمه
مشق: تمرین
اؤزل: خاص
گوموش: نقره
کد خبر 6450
