هر آخشام تورکجه ورزش اوخو (404)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
اورمییه‌نین اویونچولاری پول آلابیلمه‌ییبلر
کئچن هفته اورمییه‌نین والی‌سی شهرداری اورمییه والیبال تیمی‌نین مشق‌لرینه باش چکمیش‌دیر. او بو گؤروشمه‌ده اویونچولارین بورج‌لارینین اؤده‌نیلمه‌سینه امر ائتمیش‌دیر. آنجاق اونون سؤزلری یئرینه یئتیریلمه‌ییب. سوپرلیگ تیم‌لرینین بیر چوخو اویونچولارین پول‌لارینین یوزده اوتوزون اؤده‌میش‌لر. شهرداری اورمییه‌نین اویونچولاری سؤزلشمه‌لریندن یازیلان پولون یوزده بئشین آلمیش‌لار. رضا رحمانی، اورمییه‌نین والی‌سی شهرداری‌نین مشق‌لرینده اویونچولارین ایستک‌لرینی دینله‌دیکدن سونرا پول‌لارینین اؤده‌نیلمه‌سینه سؤز وئرمیش‌دیر.
حسینی تیراختورا قاییتدی!
سید مهدی حسینی، تیراختورون اویونچوسو یئنی فصل‌ده مئیدانا گئده‌بیلمه‌میش‌دیر. آنجاق سون گون‌لرده یئنی‌دن تیمین مشق‌لرینه قاتیلمیش‌دیر. او دراقان اسکوچیچ‌‌ین نظارتی آلتیندا مشق ائتمک‌ده‌دیر. حسینی ایکی ایل یاریم اؤنجه مس‌رفسنجان باشگاهیندان آیریلیب تیراختورا قوشولموش‌دور. تیراختورا قوشولدوغو ایلک فصل‌ده ۲۸ یاریشمادا مئیدانا گئتمیش‌دیر. اوچ قول دا وورموش‌دور. کئچن فصل سوپرلیگ‌ده ۱۴ اویون اوینامیش‌دیر. ایکی دفعه ده آسیا یاریشمالاریندا مئیدانا گئدیب بیر قول وورموش‌دور. بو اویونچو مصدوم اولدوغو اوچون سککیز آی تیراختورون ترکیبیندن اوزاق قالمیش‌دیر. سون دفعه ۱۴۰۳-جو ایلین بهمن آییندا تیراختور-الخالدیه یاریشماسیندا مئیدانا گئتمیش‌دیر.
حسین‌زاده میللی تیمین بیرینجی‌سی
امیرحسین حسین‌زاده ایران‌لا روسیه‌نین یاریشماسیندا حریفین داروازاسین آچمیش‌دیر. بو گونه قدر حسین‌زاده میللی تیمین اَن چوخ قول ووران اویونچوسودور. او بوندان اؤنجه میللی تیمین اوردوسونا چاغیریلدیغی زامان نیمکت‌ده اوتوروردو. او اوزدن باجاریق‌لارینی گؤسترمک اوچون هئچ بیر فورصتی یوخ‌ایدی. آنجاق یئنی فصل‌ده میللی تیمین فنی کادری‌نین گووه‌نینی قازانمیش‌دیر. خرداد آییندا فیفادی یاریشمالاریندا قوزئی کُره‌نین قارشیسیندا ایلک میللی قولونو وورموش‌دور. اوندان سونرا یئنه میللی تیمه چاغیریلمیش‌دیر. او شهریور آییندا کافا یاریشمالاریندا اوچ قول وورموش‌دور. بو قول‌لار اونون آمارلارینا یاخشی ائتکی بوراخمیش‌دیر.
نادری گولَر اوزلو تیراختورون مشق‌لرینده
محمد نادری آلتی ایل گؤزله‌مه‌دن سونرا فیفادی گون‌لرینده ایرانین میللی تیمی اوچون افغانستان‌لا هندین قارشیسیندا مئیدانا گئتمیش‌دیر. نادری تیراختورون بوتون یاریشمالاریندا تیمین تمل ترکیبینده اویون اوینامیش‌دیر. او دفاع خطی‌نین سول یانین‌دا پارلاماق‌دادیر. گؤزلنتی‌لره رغمن او میللی‌یه چاغیریلمامیش‌‌دیر. امیر قلعه‌نویی بو گون میلاد محمدی‌نی تیمه چاغیرمیش‌دیر. آنجاق محمد نادری روحیه‌سینی قورویوب یوخاری انگیزه ایله تبریزده تیراختورون ترکیبینده مشق ائتمک‌ده‌دیر. او تیراختورون ترکیبینده داواملی بیر شکیلده پارلاماق ایسته‌ییر.
گؤزلنتی‌لر: انتظارات
مشق: تمرین
یاریشما: رقابت، مسابقه
قول: گل
یئنی: جدید
قارشیسیندا: روبرویش
اؤنجه: قبل
سون: آخر، پایان
اویون: بازی
اؤده‌مک: پرداخت کردن
سؤزلشمه: قرارداد
والی: استاندار
کد خبر 6456
