هر آخشام تورکجه ورزش اوخو (405)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
سراب‌لی هرکول آمریکادا نه ائتدی؟!
۲۰۲۵ مسترالمپیا یاریشمالاری آمریکانین لاس‌وگاسیندا کئچیریلمیش‌دیر. یاریشمانین ۱.۶ میلیون دولارلیق اؤدولو وارایدی. بهروز تابانی، تانینمیش سراب‌لی بدنساز ایل‌لر سونرا آمریکانین ویزاسین آلمیش‌دیر. او بو یاریشمادا فرقلی بیر فیزیک‌له صحنه‌یه چیخاراق اون‌بیرینجی اولموش‌دور. او مستر المپیا یاریشمالارینا قاتیلدیغی ایلک تجروبه‌سینده یاخشی سونوج اَلده ائتمیش‌دیر. یاریشمانین سونوندا درک لانسفورد آمریکادان ۱۴ امتیاز‌لا اوچونجو دفعه اولاراق قهرمانلیق عونوانینی قازانمیش‌دیر. تابانی فینالا چاتماسا دا اَلده ائتدییی تجروبه ایله گلن یاریشمالار اوچون داها حاضیرلیق‌لی اولاجاق‌‌دیر .
تیراختورون حریفی یئنی اویونچو آلدی
اماراتین الوحده تیمی آسیا یاریشمالاریندا تیراختورون اؤنملی حریف‌لریندن ساییلیر. ایکی هفته اؤنجه اونلارین یاریشماسی تبریزده هئچ-هئچه باشاچاتمیش‌دیر. الوحده حمله خطینی گوجلندیرمک اوچون دارکو لازوویچ صربستان‌لی وینگرله سؤزلشمه یازمیش‌دیر. بئله‌لیکله ژوزه مورایس‌ین اَلینده چوخ مهره‌لر واردیر. لازوویچ سون زامان‌لار ایتالیا فوتبالی‌نین بیرینجی سویه‌سینده چالیشمیش‌دیر. ایندی ایسه مورایس‌ین اویونچولارینین آراسینا قوشولموش‌دور.
عزیزی؛ امیرحسین میللی‌ده یاخشی اوینادی
خداداد عزیزی میللی تیمده چوخ آز زامان چالیشدیقدان سونرا بیردن بیره اونلاردان آیریلمیش‌دیر. او میللی تیمین فنی کادری‌نی کئچن آسیا میللت‌لر یاریشماسیندا دفعه‌‌لرجه نقد ائتمیش‌دیر. عزیزی سون دانیشیغیندا میللی تیمین دورومو حاقدا بئله دئمیش‌دیر:« میللی تیمین اَسکی مشقچی‌لری ویاخود اویونچولاری آراسیندا تیمین دورومو حاقدا دانیشابیلن آدام چوخدور. منجه انتقاد ائتمک ایندیکی دوروم‌دا اونلارا یاردیمجی اولابیلمز. تیمین ترکیبینده یاخشی اویونچولار دا واردیرلار. اؤرنک اوچون شجاع خلیل‌زاده ایله امیرحسین حسین‌زاده ایران-روسیه یاریشماسیندا چوخ یاخشی اویون اوینامیش‌لار.»
اَسکی: قدیمی
سون: آخر، پایان
اؤرنک: مثال
دوروم: موقعیت
یئنی: جدید
سویه: سطح
یاریشما: رقابت، مسابقه
سونوج: نتیجه
اؤدول: جایزه
ایلک: اولین
کد خبر 6465
