خبر ترکی:

اسکوچیچ تارتارا اوره‌ک توختاق‌لیغی وئردی!

دراقان اسکوچیچ‌ تیراختور- گل‌گهر یاریشماسیندان سونرا مهدی تارتاری اونوتماییب اونا اوره‌ک توختاق‌لیغی وئرمیش‌دیر. اسکو اویون‌دان سونرا تارتارا بئله دئمیش‌دیر:« اندیشه‌لنمه؛ تیمین گوجلودور. بو اولای بیر داها سن ایله تیمین اوچون باش وئرمه‌یه‌جک». سیرجان‌دا استادیومون دورومو تارتارین نفعینه دئییل‌دی. او اوزدن اسکوچیچ اونا اؤز گووه‌ن وئرمک اوچون تارتارین کئچن هفته‌لرده یاخشی سونوج‌لار قازاندیغینی خاطیرلاتمیش‌دیر. تارتار او دوروم‌دا اسکوچیچ‌ین سؤزلرینی آنلاماسا دا بو صحنه سوپرلیگانین تاریخینده اونودولماز بیر اولایا چئوریلمیش‌دیر.

لوشکیا آسیا‌نین سئچیلمیش تیمینده

تیراختور بئش قول ایله آسیا داهی‌لر لیگاسی‌نین اَن یاخشی قازانجین اَلده ائتمیش‌دیر.‌ آنجاق ای اف سی تکجه رجی لوشکیا‌نین آدینی هفته‌نین سئچیلمیش ترکیبینده یازمیش‌دیر. لوشکیا بو یاریشمادا ایکی قول ووراراق تیراختورون ائتکی‌له‌ییجی اویونچولاریندان‌ایدی. بونلارا رغمن شجاع، دانیال، هاشم‌نژاد دا شارجه-تیراختور یاریشماسیندا پاریلدامیش‌‌دیرلار. او اوزدن سئچیلمیش تیمده اولاجاق‌لاری ظن ائدیلیردی. کالیدو کولیبالی ده الهلال‌دان بو اویونچولارین آراسیندادیر. شباب‌الاهلی ایله الاتحاد تیم‌لری از قول ایله اویون‌لارینی اوددوق‌لارینا رغمن ایکی اویونچولاری آسیانین سئچیلمیش تیمینده یئرلشمیش‌دیر.

تیراختور بوتون یئرلرده بیرینجی‌دیر

تیراختور دونن سیرجان‌دا بئش-هئچه گل‌گهری اوداراق فصل‌ین اَن یاخشی سونوجون قازانمیش‌دیر. اراک‌ین آلومینیوم تیمی ده اونلاردان سونرا ایکینجی‌دیر. اسکوچیچ‌ین اویونچولاری ۱۱ قول ووراراق سوپرلیگانین اَن یاخشی حمله خطینه مالیک‌دیرلر. اونلارین داروازاسی تکجه اوچ دفعه آچیلمیش‌دیر. بئله‌لیکله سوپرلیگانین اَن یاخشی دفاع خطی‌ده اونلارین اَلینده‌دیر. دانیال اسماعیلی‌فر تیراختورون چالیشقان اویونچوسو سوپرلیگانین اَن یاخشی قول پلانی توکن اویونچوسودور. او تیراختورون حمله پلان‌لاریندا اؤنملی رول اوینامیش‌دیر. علیرضا بیرانوند ده دؤرد یاریشمادا اوچ کلین‌شیت ایله سوپرلیگانین قاپیچی‌لاری آراسیندا بیرینجی‌دیر.

یاریشما: رقابت

قول: گل

اویونچو:بازیکن

قاپیچی: دروازه‌بان

سونوج: نتیجه

داهی‌لر لیگاسی‌: لیگ نخبگان

اولای: اتفاق

اؤز گووه‌ن: اعتماد به نفس

پلان: نقشه

اؤنملی: مهم