هر آخشام تورکجه ورزش اوخو (425)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
یادگارین چمنی فاجیعه دوروم‌دا
الشرطه ایله تیراختور تیم‌لری سون مشق‌لرینی کئچیرمیش‌لر. خبرنگارلار دا اونلارین مشق‌لریندن خبر ییغمیش‌لار. اونلار استادیومون چمنی‌نی یاخیندان گؤرموش‌لر. آنجاق چمنین دورومو چوخ‌لارینین نیگران‌چیلیغینا سبب اولموش‌دور. دوغو آذربایجانین گنج‌لر و ورزش سوروملوسو پرسپولیس-تیراختور یاریشماسیندا استادیومون حاضیر اولاجاغینا سؤز وئرمیشدیر. بو سؤزه رغمن تیراختور بنیان‌دیزل‌ده پرسپولیس‌دن میزبانلیق ائتمیش‌دیر. بوندان اؤنجه خبرنگارلار چمنین دورومونو گؤرمک اوچون استادیوما گئتمک ایسته‌ییردیرلر. آنجاق سوروملولار اونلارین ایسته‌یینی رد ائتمیش‌دیرلر. او اوزدن بو گونو گؤزله‌میش‌‌لر. چمنین دورومو خبرنگارلاری شاشیرتمیش‌دیر. هیبردی چمن اَکمه‌نین سوره‌جی بیتمه‌دن کئیفیت‌ین اَلدن وئرمیشدیر.
اسکونون اؤزل پلانی صادیق اوچون
تیراختور آسیا داهی‌لر لیگاسی‌نین ایلک یاریشماسیندا مساوی سونوج قازانمیش‌دیر. آنجاق امارات‌ین شارجه تیمین بئش-هئچه اوداراق اؤز قروپوندا بئشینجی اولموش‌دور. تیراختور عراق‌لی تیمی اودماق اوچون بوتون گوجو ایله ساواشاجاق‌دیر. صادق محرمی، تیراختورون ساغ دفاع‌سی، فیزیکسل باخیمدان یاخشی‌لاشمیش‌دیر. او اوزدن تیراختورون ترکیبینه قاییتماغی اومید ائدیر. محرمی اوزون موددت کرواسی‌ده چالیشدیقدان سونرا ایرانا قاییتمیش‌دیر. او مصدوم اولدوغو اوچون بیر نئچه موددت نیمکت‌ده اوتورماق مجبوریتینده قالمیش‌دیر. آنجاق اسکوچیچ‌ین دسته‌یی ایله آددیم-آددیم یاخشی‌لاشمیش‌دیر. اسکو کئچن ایکی یاریشمادا صادیقی مئیدانا گؤندرمیش‌دیر.
آذربایجان تیم‌لری دؤوردن چیخمیش‌لار
حذفی کاپ‌ین اوچونجو آشاماسیندا اورمییه‌نین دوخسان تیمی شهرداری نوشهر ایله یاریشمیش‌دیر. اونلار اویونون ایلک یاریسیندا قول یئمیش‌لر. دوخسان یاریشمانین ایکینجی یاریسیندا قول وورماق اوچون چوخ چالیشمیش‌دیر. آنجاق ایسته‌دیک‌لرینه چاتابیلمه‌میش‌لر. حریف تیمی ایکینجی قولونو ووراراق دوخسانی یاریشمالارین دؤوروندن چیخارتمیش‌دیر. مس‌سونگون تیمی بنیان دیزل استادیوموندا کرمانشاه‌ین بعثت تیمی ایله یاریشمیش‌دیر. سونگون ایلک یاری‌دا داها گوجلو اوینادیغینا رغمن قول وورابیلمه‌میش‌دیر. ایکینجی یاری‌دا بعثت تیمی ۷۵-جی دقیقه‌ده سونگونون داروازاسین آچمیش‌دیر. اونلار ۸۵-جی دقیقه‌ده مساوی قولو وورموش‌لار. سونوندا اویون پنالتی ضربه‌لرینه چاتمیش‌دیر. اویونو بئش-اوچه بعثت قازانمیش‌دیر. بئله‌لیکله سونگون ده حذفی کاپ‌دان آیریلمیش‌دیر.
یاریشما: رقابت، مسابقه
اویون: بازی
مشقچی: مربی
اؤزل: خاص، ویژه
سون: آخر، پایان
یئنی: جدید، تازه
قول؛ گل
ائتکی: تاثیر
ائتکی‌له‌ییجی: تاثیر گذار
اؤنملی: مهم
کد خبر 6666
