هر آخشام تورکجه ورزش اوخو (427)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
اسکوچیچ اون ایل‌لیک طلسمی سیندیردی
تیراختور کئچن گون آسیا داهی‌لر لیگاسیندا مهدی ترابی‌نین قولو ایله الشرطه‌نی تبریزده اودموش‌دور. اونلار دؤرد امتیازلا هله‌لیک جدولین اوچونجو سیراسیندا دایانمیش‌‌لار. اونلار آسیانین بوندان اؤنجه‌کی یاریشماسیندا هئچ-هئچه اویونو مساوی ائتمیش‌دیرلر. تیراختور سون دفعه آسیا سویه‌سینده ۲۰۱۶ قهرمان‌لار لیگاسیندا یادگار استادیوموندا بیر اویونو اودموش‌دور. او چاغ‌لاردا امیر قلعه‌نویی‌نین اویونچولاری النصر تیمی‌نی اودموش‌دورلار. اوندان سونرا ۲۰۱۸-جی ایل‌لرده تیراختور دؤرد اویونو اودوزوب، ایکی اویونو مساوی ائده‌ره‌ک یاریشمالارین داوامینی اَلدن وئرمیش‌دیر. هابئله سونراکی ایل‌لرده ده اونلار یادگار استادیوموندا یاخشی سونوج‌لار اَلده ائده‌بیلمه‌میش‌دیرلر. بئله‌لیکله دراقان اسکوچیچ‌‌ین اویونچولاری دوننکی یاریشمادا اون ایل‌لیک بیر طلسمین سیندیرماغینی باجارمیش‌دیرلار.
الشرطه‌نین قاپیچی‌سی؛ تیراختور گوجلودور
عراق‌ین الشرطه تیمی دوشنبه گونو تبریزده تیراختورا اودوزموش‌‌دور. اونلار سوره‌کلی اولاراق پیس سونوج‌لار قازانماق‌دادیر‌لار. ابراهیم سالم، الشرطه‌نین اَسکی قاپیچی‌سی بو یاریشما بئله دانیشمیش‌‌دیر:« الشرطه‌نین طرفدارلاری گئرچک‌لری گؤرملی‌دیرلر. آسیا داهی‌لر لیگاسی‌نین سویه‌سی چوخ یوخاری‌دیر. بو یاریشمالارا قاتیلان تیم‌لرین دورومو فنی هابئله مالی باخیمدان چوخ اوستون‌دور. او اوزدن عراق‌لی تیم‌لرین بو یاریشمالارا قاتیلماق‌لاری قهرمان اوچون دئییل تجروبه قازانماق اوچون‌دور. الشرطه هر زامان انگیزه ایله مئیدانا گئتمیش‌دیر. آنجاق چالیشماق‌دان آرتیق مالی دستک‌لر اونلارا گرکلی‌دیر. تیراختورون ترکیبینده تجروبه‌لی اویونچولار واردیر. اونلارین فنی سویه‌سی ده چوخ یوخاری‌دیر.»
سونگونون دورومو حریف‌لرین نفعینه
مس‌سونگون فوتسال سوپرلیگاسی‌نین ایلک یاریم فصلینده ۳۱ امتیاز قازانمیش‌دیر. اصفهانین گیتی‌پسند تیمی‌نین امتیازی بئش نومره آرتیق‌دیر. سونگون ایکینجی یاریم فصل‌ده تیمین ایچینده اولان سورون‌لارینی دا قالدیرمالی‌دیر. سون اوچ فصل‌ده گیتی‌پسند جدولین بیرینجی‌لیینی اَلده ساخلامیش‌دیر. اونلار اؤز یئرلرینی چتین‌لیک‌له باشقا تیم‌لره وئریرلر. اونلار بوتون گوج‌لری‌له اوچونجو قهرمانلیق‌لارینی قازانماق اوچون چالیشماق‌دادیرلار. آنجاق سونگونون دورومو یاخشی دئییل‌دیر. سونگون باشگاهی‌نین اداره بؤلومونده بؤیوک سورون‌لار واردیر. باشگاهین باش‌مودورو بللی اولمامیش‌دیر. مودورون یئرینده اوتوران شخص‌ین ده امضا حقی یوخدور. تیمین مشق‌لری ده داواملی شکیلده کئچیریلمه‌ییر. بو مسئله‌لر قهرمانلیق رؤیاسینی سونگون‌دن اوغورلایابیلر.
داهی‌لر لیگاسی: لیگ نخبگان
قول: گل
سون: آخر، پایان
اویون: بازی
داوام: ادامه
یاریشما: رقابت، مسابقه
اویونچو: بازیکن
سونوج: نتیجه
قاپیچی: دروازه‌بان
اَسکی: قدیمی
سویه: سطح
سورون: مشکل
باشقا: دیگر
مشق: تمرین
کد خبر 6689
