هر آخشام تورکجه ورزش اوخو (428)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
تیراختور-پرسپولیس اویونو اؤز زامانیندا
فوتبال فدراسیونونون بیلدیری‌سینه گؤره تیراختور-پرسپولیس یاریشماسی آبانین ۳۰-جو گونو کئچیریله‌جک‌دیر. ایرانین میللی تیمی ده آبانین ۲۷-جی گونو مصر ایله یاریشاجاق‌دیر. آذرین ۳-جو گونو تیراختورلا نسف‌قارشی تیم‌لری قارشیلاشاجاق‌لار. او اوزدن تیراختور باشگاهی اویونون باشقا بیر وقت‌ده کئچیریلمه‌سینی ایسته‌میش‌دیر. بو ایکی تیمین یاخلاشیق ۱۲ میللی اویونچولاری واردیر. اونلارین یوخلوغوندا بو یاریشمانین کئچیریلمه‌سی چتین اولاجاق‌‌دیر. آنجاق حذفی کاپ قورومونون سوروملوسونون ادعاسینا گؤره هله‌لیک بو ایکی تیم رسمی شکیلده یاریشمانین ائرته‌لنمه‌سینی ایسته‌مه‌میش‌لر. اونلارین رسمی ایسته‌یی ده اولسا بو یاریشمانین زامانی ده‌ییشیلمزدیر. تیراختورلا ملوانین اویونو دا باشقا زامانا ائرته‌لنمیش‌دیر. او اوزدن پرسپولیس-تیراختور اویونو اؤز زامانیندا کئچیریله‌جک.
والیبال اولدوزو اورمییه یولوندا
شهرداری اورمییه اوچون آلیش-وئریش گون‌لری هله بیتمه‌میش‌دیر. بو تیم کئچن ایکی فصل‌ده یاریم فینال آشاماسیندا اویون‌لارینی اودوزاراق فینالا چاتمامیش‌دیر. اونلار اَلده ائتدیک‌لری تجروبه‌لرله تیم‌لرینی گوجلندیرمک ایسته‌ییرلر. میثم صالحی، میللی تیمده چالیشان یئرلی والیبال اولدوزونون آدی عبدالرضا علیزاده‌نین لیسته‌سینده گؤرونمک‌ده‌دیر. صالحی سون زامان‌لار تورکییه‌ده چییین‌لریندن عملیات اولونموش‌دور. باشگاه‌ین مودورلری سؤزلشمه یازماق اوچون بو اویونچونون ساغلیق بلگه‌سینی گؤزله‌ییرلر. آنجاق صالحی بو شرط‌لری قبوللانمامیش‌دیر. او سؤزلشمه یازدیقدان سونرا ساغلیق تست‌لریندن کئچه‌جه‌یینی بیلدیرمیش‌دیر. آلدیغیمیز بیلگی‌لره گؤره اورمییه باشگاهی صالحی‌دن علاوه باشقا اویونچولارلا دا دانیشیق آپارماق‌دادیر.
شجاع ایله سدلار آسیا سولطان‌لاری
آسیا داهی‌لر لیگاسی‌نین دؤردونجو هفته‌سی باشاچاتمیش‌دیر. دراقان اسکوچیچ‌‌ین اویونچولاری حریف‌لرینی اوداراق سککیز امتیازلا جدولین اوچونجو سیراسینا چاتمیش‌لار. علیرضا بیرانوند اوچ کلین‌شیت ایله قاپیچی‌لار آراسیندا بیرینجی‌دیر. تیراختورون ایکی دفاع اویونچوسو دا یاخشی امتیازلار اَلده ائتمیش‌لر. توپو آتماق(clearance) بؤلومونده اومید یوسوپ چین‌لی اویونچو ۳۹ نومره ایله بیرینجی‌دیر. اوندان سونرا الکس سدلار ۳۶ نومره ایله هابئله شجاع خلیل‌زاده ۳۴ نومره ایله ایکینجی و اوچونجو اولموش‌لار. بئله‌لیکله تیراختورون دفاع اویونچولاری آسیانین باتی بؤلگه‌سینده سولطان‌لیق ائدیرلر. شجاع‌نین پاس‌لارینین سایی دا یوخاری‌دیر. او دؤرد یاریشمادا ۲۲۵ پاس گؤندرمیش‌دیر. تیراختورون کاپیتانی بو باخیمدان آسیانین اَن یاخشی‌لاری آراسیندادیر.
اویون: بازی
اویونچو: بازیکن
باشقا: دیگر
قوروم: سازمان
سوروملو: مسئول
یاریشما: رقابت
سؤزلشمه: قرارداد
بیلگی: اطلاعات
یئرلی: بومی
داهی‌لر لیگاسی: لیگ نخبگان
آشاما: مرحله
بؤلوم: قسمت
قاپیچی: دروازه‌بان
کد خبر 6698
