هر آخشام تورکجه ورزش اوخو (432)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
کریم‌آذرین ایلک اویونو
سعید کریمآذر تیراختورون آکادمی‌سینده مهاجم اولاراق فوتبال دونیاسینا تانیتدیریلمیش‌دیر. آنجاق پاکو خمس اونو دفاع خطی‌نین سول یانینا گؤندرمیش‌دیر. او یئنی فصل‌ده اویناماق فورصتی اَلده ائتمه‌میش‌دیر. آنجاق تیراختور-خیبر اویونوندا یئنی فصل‌ده ایلک دفعه اولاراق مئیدانا گئتمیش‌‌دیر. محمد نادری مصدوم‌دور. او اوزدن صادق محرمی ایله دانیال اسماعیلی‌فر دفاع خطینی قوروماغا چالیشمیش‌دیرلار. آنجاق محرمی یاخشی اویون اوینامامیش‌‌دیر. اسکوچیچ یاریشمانین ۸۲-جی دقیقه‌سینده کریم‌آذری اونون یئرینه مئیدانا گؤندرمیش‌دیر. کریمآذر یاخلاشیق ۲۰ دقیقه اویون اوینامیش‌دیر. آنجاق ائتکی‌له‌ییجی بیر حرکتی اولمامیش‌دیر. بونلارا رغمن اونون نیمکت‌ده اوتورماق طلسمی سینمیش‌دیر.
قهرمانلیق یولو اودوزماق‌دان کئچیر
تیراختور سوپرلیگانین ۱۰-جو هفته‌سینده خیبره اودوزموش. بو سونوجون نه قدر اوزوجو اولدوغونا رغمن طرفدارلار بیر داها آذربایجان فوتبالی‌نین کولتورونه لاییق بیر تپکی گؤسترمیش‌‌لر. تی‌تی بو اولای‌دان سونرا «عیبی یوخ» سؤزو ایله اویونچو‌لارلا تیمین فنی کادرینا دستک اولموش‌لار. بو قیسا شعار ایل‌لر بویو تیراختورچولارین سئوگی و دوزومونون سیمگه‌سی اولموش‌دور. دراقان اسکوچیچ‌‌ین تیمی اوزون ایل‌لردن سونرا یئنی‌دن آذربایجان فوتبالینا اومید گتیرمیش‌دیر. او اوزدن طرفدارلار تیمین فنی کادرینا گووه‌نمک‌له اَن چتین آنلاردا اونلارا دستک اولموش‌لار. «عیبی یوخ» دئییمی ۱۳۸۸-جی ایلدن تیراختور کولتورونون آیریلماز بؤلومو اولموش‌دور. بو شعار تیراختورچولارین زنگین کیملیینی گؤستریر. تیم‌لرین بیر چوخو بئله بیر کولتورون حسرتینده‌دیرلر.
محبی؛ تیراختور آسیانین گوجلو تیم‌لریندن‌دیر
مسعود محبی خیبر خرم‌آبادین اویونچوسو دوننکی یاریشما حاقدا بئله دانیشمیش‌‌دیر:« تیراختورون کئیفییت‌لی بیر تیم اولدوغو یاخشی بیلیردیک. او اوزدن بو یاریشمانین چتین اولاجاغینی ظن ائدیردیک. تیراختورون چوخ یاخشی و یوخاری سویه‌لی اویونچولاری واردیر. بیز آسیانین گوجلو تیم‌لریندن بیرینی اوددوق. سوپرلیگانین یئنی فصلی چوخ چتین فصل‌دیر. فصلی پیس باشلاساق دا ایندی جدول‌ده یاخشی دوروم‌داییق. بو اوچ امتیاز بیزیم اوچون چوخ ده‌یرلی‌دیر. دئمه‌لییم فوتبال‌دا اویونچولارین مصدوم اولماسی نورمال‌دیر. بیز واخت ایتیرمک فیکرینده دئییل‌دیک. »
یاریشما: رقابت، مسابقه
اویون: بازی
اویونچو: بازیکن
ائتکی: تأثیر
تپکی: واکنش
سونوج: نتیجه
یئنی: جدید
گووه‌نمک: اعتماد کردن
دستک: کمک، حمایت
کولتور: فرهنگ
بؤلوم: قسمت
ده‌یرلی: باارزش
سویه: سطح
دوروم: موقعیت
سیمگه: نماد، نشانه
کد خبر 6736
