خبر ترکی:

پرسپولیس؛ اویون تبریز دیشیندا کئچیریلسین

علیرضا صالحی، استیناف کمیته‌سی‌نین باشچی‌سی، پرسپولیس باشگاهی‌نین مودورلرینه بئله بیر سورو وئرمیش‌دیر:« هوادارلارین استادیوما گلمه‌سی سیزین اوچون سورونلودور؟» اینانلو دا بئله جاوابلامیش‌دیر:« هئچ بیر سورون و قورخو یوخدور. حذفی کاپ‌ین یاریشماسینی شایعه‌لردن اوزاق قالماق اوچون تبریزدن ائشیک‌ده سکی‌لری یاری-یاری بؤلوشمک‌له کئچیرمک اولار. آنجاق تیراختور یوزده یوز اونلارین بو ایسته‌یینه یوخ دئیه‌جک‌دیر. تیراختور بو چتین یاریشمادا هوادارلارینین دسته‌یی ایله حریفین اودماق ایسته‌ییر.

اینانلو صالحی ایله دانیشارکن بو حاقدا بئله دئمیش‌دیر:« حؤکم‌ده باش وئرن یانلیش‌لیق روحسل سورون‌لارا سبب اولموش‌دور. پرسپولیس‌ین طرفدارلارینی قاندیرمالییق. منیم تکجه بیر اؤنریم واردیر. اویونو تبریزدن ائشیکده یاری-یاری هوادارلا کئچیرمک ایسته‌ییریک.»

اوروپا قهرمانی تبریزه گله‌جک!

السد تیمی قطرین اولدوزلار لیگاسیندا هابئله آسیا یاریشمالاریندا پیس سونوج‌لار قازاندیقدان سونرا باشگاهین مودورلری تیمین رهبرلیینی فلیکس سانچزین اَلیندن آلمیش‌لار. اونلار روبرتو مانچینی‌نی اونون یئرینه گتیرمیش‌لر. السد قطرین اولدوزلار لیگاسیندا آلتی اویوندان تکجه سککیز امتیاز قازانمیش‌دیر. اونلار آسیانین دؤرد یاریشماسیندان ایکی امتیاز قازانمیش‌لار. بو پیس سونوج‌لاردان سونرا قطرلی مودورلر تیمین مشقچی‌سینی ده‌ییشمیش‌لر. روبرتو مانچینی ایتالیانین میللی تیمی، منچسترسیتی هابئله اینترمیلان ایله قهرمانلیق تجروبه‌سی واردیر. او عربستان میللی تیمیندن آیریلدیقدان سونرا السددن اؤنری آلمیش‌دیر. تیراختورلا السد تیم‌لری آبانین ۲۱-جی گونو تبریزین یادگار استادیوموندا یاریشاجاق‌لار.

تیراختورون مصدوم‌لاری نه دوروم‌دادیر؟

یئنی فصل‌ده تیراختور دال‌ با دال چتین یاریشمالارا قاتیلدیغی اوچون اویونچولارینین بیر چوخو مصدوم اولموش‌دور. محمد نادری، ایقور پوستونسکی، مهدی ترابی، مهدی حسینی یئنی فصل‌ده مصدوم اولموش‌دورلار. مهدی ترابی بیر آی مصدوم اولدوق‌دان سونرا اویون مئیدانینا قاییتمیش‌دیر. آنجاق باشقالارینین دقیق دورومو بللی دئییل‌دیر. باشگاه‌ین دا رسانه‌سی بو حاقدا هئچ بیر بیلدیری یایینلامامیش‌دیر. نادری ایله پوستونسکی دراقان اسکوچیچ‌‌ین اؤنملی مهره‌لریندن‌دیرلر. بو ایکی اویونچونون یوخلوغو طرفدارلارین دا نیگران‌چیلیغینا سبب اولموش‌دور. تیراختور باشگاهی بو قونودا تیمین طرفدارلارینی بیلگی‌لندیرملی‌دیر.

اویون: بازی

اویونچو: بازیکن

سورو: سوال

یاریشما: رقابت، مسابقه

سورون: مشکل

یانلیش: اشتباه

سکی: سکو

سونوج: نتیجه

مشقچی: مربی

یئنی: جدید

اؤنملی: مهم

قونو: موضوع

بیلگی: اطلاعات