هر آخشام تورکجه ورزش اوخو (442)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
خبر ترکی:
پرسپولیس‌ین اولدوزو؛ تراکتور قهرمان‌دیر
فرزاد حاتمی پرسپولیس‌ین اَسکی اولدوزو هابئله فوتبال اوزمانی سوپرلیگانین قهرمانی حاقدا بئله دئییب:« سپاهان، تراکتور هابئله پرسپولیس تیم‌لری هر زامان قهرمانلیغین ایلک شانس‌لاریندان اولموش‌لار. آنجاق منجه یئنی فصل‌ده تراکتور ویاخود استقلال تیم‌لریندن بیری قهرمانلیق عونوانینی قازاناجاق‌دیر.»
حاتمی استقلال‌ین یوخاری سیرایا چاتماق شانسی حاقدا بئله دانیشیب:« اونلار یاخشی اویناماق اوچون چوخ گئج اؤزلرینه گلیب‌لر. تأسسوفله زامانیندا امتیاز توپلاماییب‌لار. ایندی ایسه استقلال ایله سپاهان تیم‌لری احتمال‌‌لارا بئل باغلامالی‌دیرلار. آنجاق فوتبال‌دا اینانیلماز اولای‌لار باش وئره‌بیلر. اونلارین دا یوخاری سیرایا چاتماق اوچون شانس‌لاری واردیر.»
عالیشاه حذفی کاپ‌دا تبریزه گلمه‌یه‌جک!
امید عالیشاه، پرسپولیس‌ین اویونچوسو کئچن فصل‌ین محرومیت‌لرینه گؤره تراکتور-پرسپولیس اویونونا قاتیلمایاجاق. سوپرلیگ تیم‌لری حذفی کاپ یاریشمالارینین ایلک آشاماسینا چاتیب‌لار. فوتبال فدراسیونو محروم اولان اویونچولارین آد لیسته‌سینی یایینلاییب. امید عالیشاه‌ین دا آدی اونلارین آراسیندا‌دیر. پرسپولیس‌ین کاپیتانی بو اؤنملی یاریشمانی اَلدن وئریب. وحدت حنانوف، سپاهانین اویونچوسو دا بو آشامادا تیمینه یاردیمجی اولابیلمه‌یه‌جک. بو لیسته‌ده سعید اخباری، چادرملونون مشقچی‌سی، روح‌الله اصغری آلومینیوم‌دان گؤرونمک‌ده‌دیرلر.
اورمییه تلوزیونوندا شهرداری‌یه یئر یوخدور
شهرداری اورمییه بو گون ساعات ۱۶-دا سوپرلیگانین ایلک هفته‌سینده تهرانین صنعتگران امید تیمینه قوناق اولموش‌دور. آنجاق باتی آذربایجانین کانالی بو یاریشمانی یایینلاماییب. او اوزدن شهرداری‌نین طرفدارلاری اویونو اینترنتی تلویزیون‌لاردان ایزله‌مک مجبورییتینده قالمیش‌لار. شهرداری اورمییه تکجه بیر باشگاه دئییل. بو تیم‌ده تراکتورا تای آذربایجان کولتورونون بیر پارچاسی‌دیر. آنجاق بؤلگه‌نین تلویوزیون سوروملولاری عموم میللتین ایسته‌یینی اؤنمسه‌ییرلر. شهرداری کیمی هواداری چوخ اولان تیمین اویون‌لارینی جانلی شکیل‌ده یایینلاماق اونلارین بورجودور. هابئله بو ایش اونلاری دا فایدالاندیرابیلر. آنجاق تلویوزیون سوروملولاری میلیون‌لارجا اینسانین ایزله‌مک ایسته‌دییی اویونو بوراخیب باخیشی آشاغی اولان برنامه‌لری یایینلاماق ایسته‌میش‌لر.
اَسکی: قدیمی
اویونچو: بازیکن
اویون :بازی
مشقچی: مربی
یئنی : جدید
سیرا: رده، ردیف
آشاما: مرحله
ایلک: اول
اؤنملی: مهم
سوروملو: مسئول
بؤلگه: منطقه
کد خبر 6820
