هر آخشام تورکجه ورزش اوخو (453)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
خبر ترکی:
چادرملو حاکیملرین توتومونا اعتراض ائتدی
کئچن گون تراکتور اوچ-بیره اردکانین چادرملو تیمین اودوب. چادرملونون فنی کادری اویوندان سونرا حاکیملرین قضاوتینه اعتراض ائدیبلر. اونلار یاریشمانین ایلک آنلاریندان دا مئیدانین قیراغیندا حاکیملره اعتراض ائدیردیرلر. چادرملو یاریشمادان سونرا ایکی ویدیو یایینلادی. اونلار تراکتورون نفعینه توتولان پنالتینی یانلیش بیر حرکت بیلیرلر. بوندان علاوه اونلارین نظرینه گؤره اودیل خامروبکوفون رضا محمودآبادی ایله چارپیشماق صحنهسینده تراکتورون اویونچوسو قیرمیز کارت آلمالیایدی. چادرملونون فنی کادرینین نظرینه گؤره حاکیمین بو ایکی توتومو اویون سورهجینی دهییشیب. یزدین تیمی بو گون باشگاهین رسمی رسانهسینده باشقا بیر مسئلهیه ده اعتراض ائدیب. شجاع خلیلزاده ایله رنی بوبویون چارپیشماق صحنهسینده چادرملونون اویونچوسو ساری کارت آلیب. آنجاق اردکانلیلار بو کارتین یانلیشجا وئریلدیینه اینانیرلار. اونلارین فیکرینه گؤره مهدی ترابی ایله سعید محمدیفردین چارپیشماق صحنهسینده ده ترابی قیرمیز کارت آلمالیایدی.
هاشمینژادین ائتکیسی تراکتورون اوچ قولوندا
تراکتور-چادرملو یاریشماسینین ایلک یاریسیندا مهدی هاشمینژادین یوخلوغو چوخلارینی شاشیرتدی. آنجاق اویونون ایکینجی یاریسیندا حریفین اویونچولاری یورولارکن اسکوچیچ اونون انرژیسین قوللاندی. هاشمینژاد مئیدانا گیردییی آندان چادرملونون دفاع خطینی سیندیردی. او گوجلو بیر پاس ایله دوماقوی دروژدوکا قول وورماق اوچون چوخ یاردیمجی اولدو. نئچه دقیقه سونرا گؤزل بیر پاس ایله توپو امیرحسین حسینزادهیه چاتدیردی. حسینزاده ده توپو دوماقویا وئردی. بو اوچ ضربهنین سونوجوندا ایکینجی دفعه اولاراق چادرملونون داروازاسی آچیلدی. یاریشمانین سون دقیقهلرینده ده هاشمینژادین تیبور هالیلوویچه وئردیی پاس پنالتی خطاسینا سبب اولوب تراکتورون اوچونجو قولون یاراتمیشدیر. اسکوچیچ ترابی، هاشمینژاد ، هالیلوویچ و لوژکیانی نیمکتده اوتورتماقلا اونلارین انرژلرینی حساس آنلار اوچون ساخلاماق ایستهییر.
سونگونون قهرمانلیغی اَلدن گئدهجک؟!
فوتسال سوپرلیگاسینین اونآلتینجی هفتهسینده مسسونگونله گهرزمین تیملری سیرجاندا گؤروشوبلر. گهرزمین بو آلتی امتیازلیق یاریشمادا سونگونو اودوب. بو سونوج ایله مس تیمی قهرمانلیق یولوندان بیر آددیم اوزاقلاشیب. یاریشمانین ایلک یارسیندا سالار آقاپورون قولو ایله گهرزمین سونگونو قاباقلاییب. ایکینجی یاریدا سیرجانلیلارین نفعینه باشاچاتیب. امیرحسین غلامی اونلارین اوچونجو قولون ووروب. سونگون ده یاریشمایا قاییدابیلردی آنجاق بهروز عظیمی آلتی قدم ضربهسین وورابیلمهدی. آنجاق بیر نئچه دقیقه سونرا او آغیر بیر ضربه ایله سعید مومنینین داروزاسین آچیب. سونگونون ایکینجی قولون دا مهدی مهدیخانی وورموشدور. آنجاق اونلارین بو چالیشمالاری اودوزماقدان قاچماق اوچون یارارلی اولماییب. بو اویوندان سونرا سونگون قهرمانلیق شانسینین بیر چوخونو اَلدن وئریب.
اَسکی: قدیمی
اویونچو: بازیکن
اویون :بازی
مشقچی: مربی
یئنی : جدید
سیرا: رده، ردیف
آشاما: مرحله
ایلک: اول
اؤنملی: مهم
سوروملو: مسئول
بؤلگه: منطقه
سونوج: نتیجه
باشقا: دیگر
ایلگی: ارتباط
اؤلکه: کشور
کد خبر 6903
