هر آخشام تورکجه ورزش اوخو (458)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
افضل قازاندی آنجاق سؤیوش ائشیتدی!
فوتسال سوپرلیگاسینین ۱۴-جو هفتهسینده مسسونگون ایکی قول ایله پالایش نفت تیمین اودوب. بو یاریشمانین سکیلرینده باش وئرن حاشیهلر مئیدانین ایچیندن داها آرتیق دیققت چکیب. مجتبی پارساپور ایله سجاد یوسفخواه سونگونون قوللارینی ووروبلار. سالونون سکیلرینده طرفدارلارین آراسیندا باش وئرن آنلاشمازلیق سونوجوندا فیزیکسل چاتیشمالار باش وئریب. بیر نئچه نفر ده بیربیرلرینی تاپداییبلار. علیرضا افضلین سون توتوملاری بو ساواشلارین نهدنیایدی. او تیمین بیر نئچه اولدوزو اؤزللیکله فرهاد فخیمی تیمدن چیخاریبدیر. گیتیپسند ده قزوینین پردیس تیمین اودوب. او اوزدن اونلار بیرینجیلیکلرینی قورویوبلار.
نادری ده ساری منطقهیه چاتدی!
سوپرلیگانین ۱۲-جی هفتهسینده تراکتورلا خوزستانین استقلال تیملرینین اویونو هئچ-هئچه باشاچاتدی. یاریشمانین اؤنملی مسئلهلریندن بیری محمد نادرینین محرومیت منطقهسینه یاخینلاشماسیایدی. شجاع خلیلزاده بوندان اؤنجه دؤرد ساری کارتلا خیبر-تراکتور یاریشماسیندا محروم اولدو. تراکتور او یاریشمانی اودوزدو. ایندی ایسه محروم اولماقلا بیر کارت آراسی واردیر. محمد نادرینین ده ایکی کارتلی اویونچولارین آراسینا قوشولماسی ایله ایکی کارتلی اویونچولارین سایی دؤرده چاتیب.
اوچ کارتلیلار: شجاع خلیلزاده
ایکی کارتلیلار: محمد نادری ، اودیلجان خامروبکوف ، تیبور حالیلوویچ ، مسعود زائر کاظمی
گلن هفتهلر بو مسئله دراقان اسکوچیچ اوچون بؤیوک سورونلار یارادابیلر. تراکتور قهرمانلیق کورسوندا اولدوغو اوچون هر بیر اویونچونون محروم اولماسی تاکیک باخیمدان تیمه بؤیوک ائتکیلر بوراخابیلر.
استقلال تراکتورون قارشیسیندا طلسم سیندیردی
خوزستانین استقلال تیمی دونن تبریزدن بیر امتیاز ایله اؤز شهرینه قاییدیب. بو بیر امتیاز اونلار اوچون اؤنملیایدی. اونلار تراکتورلا قارشیلاشدیقلاری سون یئددی یاریشمانی اودوزموشدورلار. بو یاریشمالاردا تراکتور استقلالا ایییرمی بیر قول ووروب استقلال دا تکجه بیر دفعه تراکتورون داروازاسین آچیبدیر. آنجاق دونن امیر خلیفهنین اویونچولاری تبریزده بؤیوک ایش گؤروبلر. اونلار بو آجی سونوجلارا سون قویوبلار. استقلال تراکتورون قارشیسیندا یاخشیجا دایاندی. تراکتورون ترکیبینده بؤیوک اویونچولار واردیر. اونلار قهرمانلیغین آدایلارینداندیرلار. آنجاق خوزستانلیلار تراکتورون تهلوکهلی موقعیتلرینین قارشیسیندا دوروبلار. تراکتورون اویونچولاری اونلارین داروازاسین آچابیلمهییبلر. خوزستانلیلار یئنی فصلده مالی سورونلارلا اوزاوزهدیرلر. استقلالین اویونچولاری بیر نئچه دفعه اعتصاب ائدیب مشقلره قاتیلماییبلار. آنجاق اونلار دهیرلی بیر امتیازلا خوزستانا قاییدیبلار.
یاریشما: رقابت
اویون: بازی
اویونچو: بازیکن
اؤزللیکله: به خصوص
سون: پایان
توتوم: تصمیم، قرار
اؤنملی: مهم
اؤنجه: قبل
سورون: مشکل
ائتکی: تأثیر
سونوج: نتیجه
قارشیلاشماق: روبرو شدن
آدای: کاندید
یئنی: جدید
مشق: تمرین
دهیرلی: ارزشمند
کد خبر 6940
